做好保養提防雨水3大害

早幾日「凡亞比」又帶嚟唔少雨水，令人狼狽不堪，喺咁嘅天氣下，連愛車都可能面臨好多問題，好似入水、生銹等。為免令情況惡化，呢次所講嘅汽車保養方法，就特別針對因雨天而衍生嘅問題！

預先做足保養措施，雨天行車就唔使擔心有問題啦！<br>Subaru Exiga 2.0GT 售價：$319,980

預先做足保養措施，雨天行車就唔使擔心有問題啦！
Subaru Exiga 2.0GT 售價：$319,980

1.車廂滲水

車廂滲水，原因多數係車窗膠邊出問題。膠邊本身作用是吸震同防入水、防入風，不過亦會隨年月而老化變硬，嚴重起嚟表面上甚至有龜裂痕迹，大大減低密封效能。此外，曾經更換大銀幕玻璃嘅汽車，同樣有機會出現滲水問題。如果內櫳入水又置之不理嘅話，帶嚟嘅問題會令人非常頭痛，例如搞到內櫳嘅絨面出現難睇嘅水漬，假如雨水滲入冷氣入風口嘅話，仲會產生難聞嘅「噏」味。如確定膠邊出問題，就要整條膠替換，千祈唔好慳呀！

假如天窗膠邊老化變硬，就有機會出現滲水。

放大圖片

2.入水燒燈

雨天時節，濕氣重好正常，呢個時候頭燈罩最容易起霧水，燈膽梗係特別容易燒啦！如果燈罩本身有破裂情況，甚至會產生入水問題。面對以上情形，大家或會認為：「燒燈膽啫，幾百蚊換咗佢咪得囉！」但事實上並唔係咁簡單。首先，根據法例規定黃昏六點後所有行駛中嘅汽車都必須亮着車頭大燈，如果燒咗燈膽又唔更換，無論係「獨眼龍」或「盲俠」都隨時罰款收場。再講，家陣好多汽車都採用HID頭燈設計，每盞燈均連接着一個獨立「火牛」，如果燈罩入水，不但易燒燈膽，就連火牛都有機會燒埋，到時車主就需要支付數千元嘅維修費。

如果燈罩有破裂，應該盡快更換，唔係入咗水就麻煩喇！

於破損表面暫時塗上油漆，可防止生銹情況惡化。

3.車身生銹

車身嘅顏色油漆雖然可以凸顯個性，不過主要功用係防止金屬車架氧化，即係生銹。之不過油漆有機會被沙石打花，又或者因碰撞而剝落。如果唔處理，生銹範圍就會繼續擴大，不但有礙觀瞻，嚴重起嚟可能導致整塊金屬脫落，影響車身結構安全，真係唔可以忽視！如發現車身嘅油漆只有少少沙石花痕，可自行用補油筆點上新油，以防生銹，但係大範圍嘅生銹問題就比較難搞，需要去車房或原廠做噴油及防銹工程。