FIFA 11 學施治飛撲!
《FIFA》足球遊戲年年出，可進化空間唔大，尤其《FIFA 11》買晒球員、球隊、球場License，資料同畫面夠真實已屬預料之內，但睇真啲又唔係冇驚喜，好似今集最勁係可以做埋龍門，落場左飛右撲瓦解對方攻勢，而且可以應用到連線對賽之上，同朋友組隊實現真正11對11，以後Book唔到街場都可晚晚開波！
撰文 ：布偉倫
首次扮演守門員
行版《FIFA 11》用上卡卡搭朗尼做封面，但EA Sports為宣傳今集可以扮演守門員，仲簽咗車路士守門員施治做代言人。施治在遊戲入面的能力值超高，其撲球能力值更數一數二，仲會同真實一樣戴頭套上陣。之前《FIFA》系列引入「Be a Pro」育成模式，今次亦可以為成為頂級守門員而奮鬥，體驗角球打手槌以及撲救12碼，仲可以在生涯模式打足15年。初做龍門唔容易，好在遊戲提供咗AI幫手，可以揀選全輔助或半輔助模式，唔使手忙腳亂，畀人射到手軟！
新系統球員更像真
《FIFA 11》另一新招係加入「個性+」系統，透過EA Sports龐大資料搜集系統，設計出36種屬性及57種特徵去為球員分級，除以往射球、速度等基本屬性外，仲可以刻劃出每個球員在場上嘅特點、慣性同小動作，如卡卡會交出獨到嘅傳球，恩尼斯達會多用急轉盤球過人，朗尼又會拉開同防守球員嘅距離搵位射門。「個性+」系統當然亦會應用在守門員身上，有啲好似施治比較平實冇乜花巧，但有啲就會經常玩嘢，令到每個球員都變得有血有肉，唔再係一堆數據咁簡單。操控方面亦變得更人性化，其實近幾代《FIFA》已經做到傳球唔係話交就交到，今集仲要視乎玩家操控手掣嘅協調性、球員能力值以及球場上形勢做判斷，要在對方球員緊纏下交出靚助攻就變得更難。
原創球員11對11
之前《FIFA》系列已經做到每人控制一名球員上網對戰，到《FIFA 11》由於可扮演守門員，所以可真正實現網上11對11的玩法，同朋友湊成一隊上網打聯賽。雖然今集遊戲主打仍然係真實感，但都畀玩家更多空間去創造及管理原創球員，只要先到官網下載應用程式，再由外觀開始選擇不同配件及屬性便可打造原創球員，擺落單人模式或同朋友分享都掂。
大家喺自己主場還可以自訂歡呼聲同奏樂，亦可以為原創球員制訂歡呼內容，咁先至係主場吖嘛！
遊戲資料
類 型：運動
開 發：EA Sports
平 台：Xbox 360、PS3
推出日期：9月28日
售 價：$329 （Xbox 360）$380（PS3）
查詢電話：3166 6001