一個人去旅行，當然有一個人去旅行的好處，例如可獨佔一間酒店房，鍾意去邊就去邊，鍾意食乜就食乜，完全自己話事。就如將於10月中上畫、改編自同名自傳的《再單身遊記》（Eat Pray Love），電影中的女主角Liz（由茱莉亞羅拔絲飾）在生活迷惘時，毅然自我放逐一年，單身遠赴羅馬、印度和峇里，體驗自由自在的單身旅程。有機會不妨一試，或者會有新的體會！
峇里除了陽光與海灘，還有甚麼？《再》片就告訴大家還有風光如畫的田園風光和淳樸的民風，最佳的遊覽方法，就是踏着單車，慢慢感受這片悠閒氛圍。
峇里北部的Penelokan地區，是展開單車之旅的不錯選擇。大家可以先在Padpadan Village揀好單車，沿途經過Manukaya村，村內有座建於15世紀的荒廢廟宇，還有不少熱情友善的村民。接着再穿過層層梯田，踩入熱鬧巿集，途中可隨時停下拍照，非常寫意。
田園單車之旅
收費：Rp852,000（約HK$738）
電影中茱姐的單身之旅以羅馬為首站，全程喪食冇留手，而且擺落口的大部分都是超高卡路里的甜品和雪糕，將自己徹底釋放。咁又係嘅，意大利雪糕Gelato出名香滑，試問邊個忍到口！
在羅馬街頭，隨處找到賣Gelato的店子，其中在西班牙廣場附近的Cardesi，便有人氣Gelato店Caffetteria Antica Rome，不但Gelato口味多，連雪糕筒的選擇亦多，包括朱古力筒、花生粒筒和脆皮杯。選定後，靚女店員會為雪糕粉飾，不一會，一個賣相可愛的老鼠Gelato便出現在大家眼前，未食已經甜死。
Caffetteria Antica Rome
地址：Via Di Propagada 26/B, Piazza Spagna, Rome
營業時間：12:00nn~8:00pm
一個人來到印度德里，有咩好做，唔通真係要學捧着新增23磅肥肉的茱姐那樣，在破舊的廟宇中禪修冥想？爛廟！仲要冥想！相信十個有九個都會耍手擰頭。不過，若然破廟變五星級度假村，冥想變成瑜伽，環境清幽兼有專人指導，咁又點睇呢？
新德里安縵（Aman New Delhi），是由澳洲建築師Kerry Hill一手打造的「淨土」。清晨6時半，酒店的瑜伽師傅會帶大家前往Lodhi Garden，在柔和和陽光下邊做瑜伽，邊呼吸新鮮空氣，用心去感受德里的另一片天。
Aman New Delhi
地址：Lodhi Road, New Delhi110003, India
房價：US$750起（約HK$5,850）
瑜伽課程：1人Rs4,500（約HK$750）
簽證：前往峇里，持特區護照免簽證，持BNO可辦理落地簽證；前往羅馬，持特區護照或BNO均毋須簽證；前往印度，持特區護照或BNO均須簽證。
機票：香港至峇里來回經濟客位機票，$2,250起；香港至羅馬來回經濟客位機票，$4,050起；香港至德里來回經濟客位機票，$2,920起。
貨幣：HK$1約兌Rp1,154；1歐元約兌HK$9.9；HK$1約兌Rs6
撰文：林登麗