Motorola Quench聽歌尋知音

依家連山寨機都聽到歌，搞到Music Phone嘅地位愈來愈低，之不過Motorola就「人棄我取」，日前新機Quench大賣聽歌功能，透過全新CMP音樂介面，聽歌之餘仲可以睇埋歌詞、MV兼收聽網上電台，咁多嘢聽仲邊有時間聽電話呀！

收聽過千電台

自Milestone後，摩記好似甦醒了一樣，新機浪接浪地推出，日前再推中階機Quench。手機以Music Phone自居，為此特別加入一個CMP （Connected Music Player）播歌介面，除支援MP3、WMV及ACC等音樂格式外，還可直駁Internet取得更多內容，例如透過歌曲識別功能搵到歌詞及歌名，或經YouTube找尋歌曲MV等。Quench可聽FM收音機，嫌唔夠還可駁上SHOUTCast收聽過千個網上電台，中西音樂都能盡入耳窩。另外，CMP還有一個Blip功能，用家可經此在Twitter發表聽後感，或在Google Maps看看附近途人聽咩歌，迅速找尋知音人。

操作媲美iPhone

智能系統方面，Quench採用Android 1.5，雖然比較落後，但在512MHz處理器幫助下，無論放大相片或開啟網頁，反應都同樣順暢。提到放大，其3.1吋屏幕採用了電容式背板，支援「Pinch and Zoom」多點觸控，兩指開合便能縮放，配合芒底可當Mouse使用的Navi Pad，操作手感唔差過iPhone。上網方面，3.5G模組速度達7.2Mbps，並支援Wi-Fi，去到邊都可快速上網，惟留意瀏覽器僅對應Flash Lite，播短片時速度及畫質一般。

內置歌詞同步功能，聽歌時歌詞會在屏幕底部出現，隨時跟住唱。	Quench支援歌曲識別，可直駁YouTube取得短片，例如小記聽緊蕭敬騰《王妃》，經此就搵到大量MV。	若附近有人使用CMP播放器聽歌，音樂地圖就可搵出他的所在位置，迅速找到知音人。
芒底設Navi Pad，可當作四向鍵使用，捽一捽便能控制鼠標方向。	經3.5G上網，唔使10秒就入到ontv網址，不過睇唔到短片。	機背布滿車胎紋，就算手汗幾大都唔怕跣。左上角係500萬像素鏡頭連閃燈。

滑動輸入法

打字方面，Quench內置5種中文輸入法，包括拼音、注音、倉頡及筆畫，並提供手寫識別，無論係潦草或簡體字，都能準確識別；用家更可透過手寫符號，直接刪除或輸入字元，比篤芒按掣方便。此外，它還提供Swype英文輸入法，可以滑動方式快速輸入英文，減低打錯機會。至於影相，配備500萬像素鏡頭連閃光燈，規格跟高一班嘅Milestone相同，並且支援半按快門、數碼變焦及Geotagging，Snapshot夠用有餘了。