跟Bally結緣 古天樂時裝智慧
【吳靜嫻、劉智源米蘭直擊】或許，許多人都不知道古天樂自小已喜歡時裝的，都以為他與品牌之間僅是商業的合作。早前，古天樂遠赴米蘭走進時裝圈，從環保、生活和藝術角度暢談時裝經，讓人解構他的時裝態度。
找古天樂回應緋聞或是非，由始至終都是一句：「唔回應。」不過，講到時裝，他是滔滔不絕的。近年成為時尚界新寵的古天樂，早前獲瑞士品牌Bally之邀走出電影圈，展開時裝重地——米蘭的四日三夜之旅，放下電影宣傳，盡情暢談時裝。古仔身負Bally首位華人拍攝宣傳硬照的重任，作客擔任模特兒，原來古仔小時的夢想竟然是當模特兒擺甫士行天橋，沒錯，是當模特兒。
受媽咪耳濡目染，古仔自十多歲已與時裝這個華麗工業結緣。人家睇《430穿梭機》睇卡通片，他卻轉去明珠台睇時裝騷；人家睇漫畫，他就睇時裝雜誌。「其實係因為媽咪鍾意時裝，仲會做衫畀我同細佬着，媽咪睇乜我又跟住睇，睇吓睇吓就鍾意，見到啲模特兒行貓步好有型，當時我就諗第日要入行做model！」誠然，人靠衣裝，尤其是做藝人的，外表的包裝決定風格。入行初期，古仔也花很多很多錢在置裝方面，追潮流追名牌更是理所當然的。
由名牌到環保
過渡了一味追求的摸索階段，古仔已建立了屬於自己的一套時裝觀：「以前買衫，款式都比較特別，唔可以翻着，而且我爸爸有四十吋肚腩唔啱着，細佬又嫌啲款誇張，着一次就畀人，唔環保又浪費。呢兩、三年心態唔同咗，買衫會考慮環保問題，置裝主要係為工作，尤其係出席公開活動，唔敢亦都唔會再買過分特別嘅款式，主要以sporty、casual款式為主，因為愈簡單嘅設計愈襟興，翻着可以靠mix & match嚟建立個人風格。」這大概就是人着衫的時裝智慧。
為了妥善處理舊衫，古仔試過找人將衫拿去作二手衫賣：「賺到嘅錢會捐去慈善機構，又或者直接將衫捐出，可以減輕地球負擔，又可以做善事，一舉兩得。」近年流行Eco-fashion，古仔亦大行其道：「買衫見到佢標明係環保物料，或者經過環保生產程序，呢啲item我都會特別支持，亦都希望以公眾人物嘅身份，作帶頭作用。」
皮鞋反映品味
愛穿得輕鬆的古仔，不等於他止步於正規的西裝紳士打扮，對配搭尤其執得緊。「喺米蘭行街，見到有個老伯伯放狗，佢嘅打扮係好有藝術感，恤衫燙貼，西裝筆挺，襯埋煲呔仲有袋巾，皮鞋擦得反光一樣亮立立，呢一種一絲不苟的衣着風格，亦都反映佢嘅生活態度，追求完美。」至於自己的穿衣態度和風格，是視乎心情和場合，而最能夠反映男士的年齡和品味，是一雙皮鞋，而皮鞋正是古仔最重視和感興趣的時裝單元之一，比西裝牛仔褲更甚。
「一對皮鞋，再靚手工都好，表面睇落去都係一對畀人着嘅鞋，但其實造鞋過程係好值得欣賞，每一個工序都要好小心，尺寸要精準，工匠嘅工夫決定一切。」古仔講得很認真，口脗儼如鞋匠在訴說造鞋美學。原來古仔是愛鞋之人，他這樣形容家中的收藏：「多到數唔晒。」他還笑言如果有天在家中數鞋，他的媽咪會以為他黐了線。多還多，但他堅持每次着完鞋，都會親手用鞋布抹乾淨，放進貼了名牌的鞋盒裏，妥善收藏，這種堅持，大概是真心愛鞋尊重鞋的人才能持之以恒。
期待度腳訂造
是鞋癡又是鞋奴的古仔，視造鞋是一種藝術，皮鞋便是藝術品。古仔渴望學造鞋，亦期待擁有一雙度腳訂造的皮鞋，他說：「好似女裝haute couture咁，只有度身訂造，對鞋是可以完全fit到腳形，而我知道Bally亦有提供呢項服務畀尊貴嘅客人，我都希望有一對。」古仔心目中的理想鞋，除了是要perfectly fit，對鞋墊亦甚講究：「我條尾龍骨唔好，之前搵咗醫生幫我訂造兩對矯形鞋墊，一對要成三、四千蚊，一對皮鞋用，一對波鞋用。」古仔認為好鞋難求，對於女性鍾情的高踭鞋，雖然他沒有試穿過但亦想像到：「愈高愈凸顯小腿優美線條，但亦係愈辛苦，長年累月咁着，尾龍骨真係唔使要。」想當然，他也會從欣賞的角度看，還會加分呢！
短褲上陣
古仔入娛樂圈前，也有當過模特兒，雖只是拍MTV，但到今日替時裝品牌作客做模特兒，不用刻意對鏡練習擺甫士，舉手投足都來得自然不造作。心水清的fans都知道他很少穿短褲，不過由於古仔很喜歡這個春夏系列充滿簡約主義的設計，加上由品牌服裝主管為他做styling，最終他穿了兩款呢！
避熱情fans
古仔走在米蘭心臟地帶拍攝時，不時有路過的fans上前要求合照攞簽名，不過，由於是次拍攝屬私人性質，故古仔和品牌都盡力避免造型外洩。有些熱情fans見古仔登上座駕，更索性拉開車門叫他合照，當時人家在換衫呢！幸好古仔的同事眼明手快及時阻止，有驚無險。又，工作人員見到古仔的後方有為數約二十名的內地旅客，為免出現難應付的場面，古仔即時找一道牆面壁，待自己不在他們的視線範圍，才能繼續拍攝。
四日三夜緊密行程
20/06 Bally私人晚宴
12:00 抵達米蘭
21:00 Palazzo Morando
21/06 參觀Bally春夏11系列發布會
14:00 Palazzo Morando
22/06 穿着Bally春夏11系列拍攝硬照
12:00 Studio White
16:00 Piazza Cordusio
17:00 Palazzo della Ragione
18:00 Duomo地鐵站、Piazza Duomo
19:00 Palazzo Reale di Milano
23/06
12:00 離開米蘭