周秀娜愈裸愈輕鬆
去年o靚模寫真大戰，周秀娜（Chrissie）贏得漂亮一仗，雖然今年要再接受30多個o靚模「胸」湧夾擊，但以「3D洞房」為寫真賣點的她坦言最大對手只有自己。不過在拍攝裸體照片時，Chrissie也曾感到尷尬，幸經過warm up之後，她已視攝影師為老公，而且愈脫愈輕鬆。
天賦魔鬼身材及EQ爆棚的Chrissie，縱使今年面對四面八方o靚模來勢「胸胸」的夾攻，仍處之泰然未有將她們放在眼內。Chrissie說：「去年推出第一本寫真時候，大家都未曾認識周秀娜，好想藉住本寫真等多啲人去了解我，所以本寫真拍攝咗我最自然嘅一面，隨心演繹番自己就可以，某程度上可以講話影得好Relex幾輕鬆。」
半裸最激最難忘
Chrissie續說：「今年大家已經唔當我係新人，而且今次寫真要求唔同咗，自自然然畀自己嘅壓力又多咗，臨飛之前幾晚都冇覺好瞓，個腦不停去諗應該點影，又驚唔夠瞓唔上妝又水腫，好驚影得唔滿意。」其實自尊心過強的Chrissie唔係驚對手圍攻，唔係驚銷量，唔係驚外間輿論，最驚都係過唔到自己心理關口。
今年Chrissie早已養精蓄銳，遠赴歐洲蒙地卡羅及尼斯，進行為期8日的拍攝工作，除了感到壓力外，她還有比上次更大的性感挑戰。
「半裸算係最激同難忘，一來個班底係首次合作，所以未必一嚟就做到想要嘅效果，大家都要慢慢warm up，二來雖然成間房清咗場只得我同攝影師，但我知要好信任佢先會影得靚，所以佢亦都有主動畀番個效果我睇，大家都覺得滿意，所以都冇話尷尬。不過由於事前知道主題係度蜜月，所以我當咗攝影師係我老公，加上為營造浪漫氣氛，所以影半裸時候燈光較暗，差啲當咗佢係Avex，好彩旅程完咗可以即刻抽離到。」
空中飛人想媽媽
由於今次寫真主題圍繞蜜月，大玩新婚洞房夜，在服裝方面不但要若隱若現的性感內衣，而且還要擺出各種嫵媚誘人的眼神及姿態，加上噴血的半裸床照，比起三點式水着晒4吋事業線更惹火撩人，難怪她直言已達到性感的極限。
「寫真女王」之名對Chrissie而言當然有得有失，今年的「空中飛人」生活令她失去不少共享天倫的時間。
「試過有一個星期要天南地北周圍飛，當媽咪打電話嚟佢第一句就問我:『阿囡，你依家喺邊一個國家？』又問我今晚返唔返到嚟？使唔使留碗湯畀我？雖然佢無親口同我講話掛住我或者係擔心我，但我真係感覺到佢想見吓我，想知我有冇定時定候食飯，又驚我做嘢太辛苦，嗰刻好想喊，先察覺到自己忽略咗屋企人，就連母親節都要靠微博同媽咪講『母親節快樂』，好驚一講電話就收唔到線。」
家庭事業兩兼顧
經過搏到盡的一年，不論出寫真、演戲，甚至連發夢都未想過自己會去唱歌同跳舞都嘗試過，Chrissie下一個目標會是甚麼呢？她說：「依家都係想30歲前結婚，唔單止要有自己嘅家庭，而且要兼顧埋事業。入行之後我發覺愈來愈鍾意表演，我知做模特兒有時間限制，所以我嚟緊好想拍多啲電影，接觸到唔同角色，對於同年紀嘅人，我會好好珍惜每一個機會。」
後記：約訪問要「唧牙膏」
約Chrissie做訪問可謂「幾經波折」，她從起床開始便一直忙個不停，訪問與拍照要分兩個時段進行，當日Chrissie的經理人左度右度說：「佢今個星期得聽日會喺香港，但佢朝早九點call time化妝set頭，跟住又做大圍活動，你唔介意可以到時做咗訪問先，然後到兩點佢又要過海睇牙，個牙醫已經唔可以再畀佢改期，四點又要casting，七點要去尖沙咀排舞，九點到十一點學戲，不過你可以喺七點前攝時間影相，最好地點喺番尖沙咀……」當日遲到的Chrissie萬分抱歉，結果她又要遲了一小時才排舞，電話訪問的時間更是凌晨兩三點才開始。原來她的時間就好像唧牙膏般一點一點唧出來。
文：專案組 攝：沈健程
服裝：Duras Ambient
場地：Red Quarter