速變大眼索Blogger

身邊好多朋友都玩緊微博,個個都想人多多關注,其實只要效法台灣美眉執靚自己,以Magic Trick的化大眼妝容,再嚟自拍索爆大頭相放喺微博做招徠,就必然可以叫人關注,想學即來關注呢個Beauty Blog!

近排台視有個綜合節目專搵索爆Blogger上去作素顏同化妝後分別最大的比賽,唔少Blogger化妝技術超高,單眼皮細眼都可以化到大3倍,真係神乎其技,仲成為大家茶餘飯後的熱門話題。

眼妝一味靠黑

要塑造美眉Blogger索樣,雙眼係主宰整個妝容的關鍵。無論你係矇豬眼、單眼皮或下垂眼,都可靠畫黑色眼線、黐黑色假睫毛和黐眼皮的技巧,去令雙眼變得圓大有神,同時以啡或灰黑眼影打造漸變的深邃眼部輪廓,再加白色的眼頭及眉骨Highlight,增強雙眼立體感。當雙眼變大之後,必須於T字位、眼肚、下巴及顎骨做光影層次,令臉部輪廓更分明。要注意當眼妝濃而誇張時,胭脂和唇彩盡量自然就OK,就更能突出大眼索樣。

STEPS

1.天生眉色黑,要用淺啡色去中和,令妝容柔和自然。

2.以淺啡色眼影掃在整個眼窩位置,之後用灰黑色眼影塗在眼皮處,營造漸變的深邃效果。

3.眼細要靠黑色眼線筆畫大眼形,留意眼頭要畫大呈尖形,眼尾少少向上翹,令眼形長而有神。

4.下眼線要夠黑實,才能令眼睛亮大。

5.用銀白或帶光澤的白色眼影,掃在眼頭三角位及眉骨處,增加眼部立體感。

6.一排濃密而長的黑色假睫毛,可令雙眼變得更大,下排假睫毛可多搽一層黑色睫毛液,令睫毛更濃密;當然想要更誇張的大眼效果,可學美眉黐三至四排假睫毛。

7.單眼皮或下垂眼,可在眼窩處搽上黐假睫毛膠水,再以托眼皮的小工具,把雙眼皮黐在稍高的眼窩位置,即時整大眼睛,當然少不了戴大眼仔Con啦!

8.當雙眼變得大而立體時,臉部輪廓會變得不分明,所以一定要用光影粉掃在T字位、眼肚、顎骨和下巴位置,突出臉部輪廓。

9.最後掃上淡粉紅色胭脂和塗上粉紅色唇膏就大功告成,如果想嘴唇豐厚似Galie,可以多搽一層唇彩呢!

撰文:黃佩琪

攝影:陳富權

模特兒:Katy(Jamcast)

化妝及髮型:Phyllis Kwok

查詢電話:(A)2506 4283、(B)2868 5389、(C)8102 1098、(D)2805 2881、(E)2118 7649