Kelly難忍老公煙臭拒親熱

【陳嘉敏北京直擊】昨日陳慧琳（Kelly）遠赴北京，出席由本地時裝設計師鄧達智擔任藝術總監的「德國時裝品牌Marc Cain 2010秋冬服裝表演」活動，同場還有內地模特兒劉丹和張靜。穿上綠色連身裙配豹紋長外套的Kelly壓軸出場，談到再做第二任媽咪，她坦言暫時言之過早：「我生完八個月，啱啱先收身，傷口要等多一年先得。（揀定邊月邊日開工造人？）唔使有呢啲schedule，（要老公操fit啲？）會呀，最緊要叫佢唔好食煙，（戒咗未？）好難，我同佢講咗，話佢咁大個人自己諗，不過佢都食少咗。我好唔鍾意人食煙，覺得好臭，如果佢想錫我，我就會話好臭，反問佢係咪食咗煙？嚇一嚇佢，我成間屋都禁煙架！」

Kelly謂下一胎想生女，但就沒有秘方，一切聽天由命，若老公戒煙失敗如何？她續說：「都有同佢講過呢個話題，但唔成功，（唔戒煙唔生？）我Daddy都食煙，我都OK，當然唔食就最好。」

內地模特兒劉丹示範品牌最新款秋冬裝。

德國時裝品牌在北京開騷，鄧達智擔任藝術總監，Kelly亦助陣。

囝囝讀書冇共識

談到「Sa基」離婚一事，問幸福劉太有甚麼夫妻相處之道？她說：「要互相尊重同信任，（你成日唔喺香港怕唔怕佢沙沙滾？）暫時唔會怕，識佢咁多年，知佢用情專一。」Kelly表示有了「蝦餃仔」後，兩夫婦分工合作湊仔，二人更多了共同話題：「佢氹BB瞓覺有一手，我就負責餵佢食嘢同沖涼。」不過她坦言總會有意見不合的地方，如囝囝讀書問題：「我鍾意國際學校，老公就鍾意本地，因為老公未讀過本地學校，我就讀過知有幾辛苦，但佢讀國際學校，唔識中文都好辛苦，總之各有各好，我淨係想個仔開心笑騎騎，我都怕為個仔將來有拗撬！」

最後提到內地旱災，Kelly表示會節約用水，問到可會一家三口洗澡減少用水？她即緊張地說：「BB唔得，我之前抱仔仔同跳舞整傷條腰，本來用浸浴紓緩，依家就改用拔罐，（叫蝦餃仔隔日沖？）唔得，我寧願自己唔沖，（同老公一齊沖？）都慳唔到幾多啦。」