日本男娘女僕　雌雄莫辨

特派記者：羅安琪 鳴謝：永安旅遊、東京Four Seasons Hotel椿山莊、Hotel Listel新宿

來幫襯的客人，並非想像中的電車男，間中更發現靚仔添！	連菜牌都是心形，真的可愛到暈。	蛋包飯都幫你畫上多啦A夢，好細心，¥1,000（約HK$86）。

男娘=新人類

去年才開業的男娘女僕Cafe名叫「Newtype」，代表他們是新人類，女僕清一色男生所扮，不夠一年已在秋葉原打響名堂，連《讀賣新聞》及《東Sport》也爭相報道，頓時變成大紅人。

加醬油入啤酒，原來味道都唔錯o架，¥620（約HK$53）。	意猶未盡，大家可以買女僕們的寫真回家，質素不錯，¥200（約HK$17）。	埋單時還可抽獎，抽中卡仔可以減¥200或更多，儲齊指定組合可以更便宜。

我充滿疑惑地推門進入內，「歡迎光臨……」一貫熟悉的打招呼方式，不過卻換了一把男聲，迎接我的是一身紅色格仔女僕短裙、長長的啡色頭髮、陽光般的笑容的Chiaki，如果不出聲，驟眼看真不知道是男生呢！

全店最受歡迎的女僕Taso，真的有男生靚到咁？	好Cute的Chibisuke為大家奉上日式炒麵加雲呢拿雪糕，會否特別甜？¥1,100（約HK$95）。	很有趣的店長J'zK，擺出一副自豪的女王甫士。

「女僕」都是調酒高手，更提供有質素又特別的菜式，店長推介醬油啤酒，即醬油溝啤酒，聽落好騎呢，飲落少少鹹味反而更醒神。此外，日式炒麵又會加個雲呢拿雪糕，凍冰冰雪糕融在熱辣辣的炒麵上，冰火交融之餘，混醬後炒麵又多了份香甜，而蛋包飯呢？另一「女僕」Asuka就幫我用茄汁畫了個多啦A夢給我，你話幾Sweet，服務夠體貼，絕不比女生遜色。

靚過真女

店內女僕各有賣點，好像充滿女王Feel的店長J'zK、可愛的Chibisuke，開朗活潑的Chiaki及楚楚可憐的Asuka等，他們跟客人有講有笑，由打機、砌模型，睇卡通到煲日劇，甚至少男心事都傾得一餐。據其中一位靚仔客人表示，他喜歡來這裏，跟性取向沒有關係，只是喜歡與平日生活不同的刺激感而已。對我這女生來說，也不會反感，皆因他們風趣又好人，即時像多了班好姊妹呢！

這班男娘的確好受歡迎，連寫真集都出埋，而且相片拍得住o靚模添！我好奇地問Chiaki：「怎樣弄出如此玲瓏浮凸的身材？」他笑一笑說：「那當然要穿女生的內衣了……」那麼胸部呢？「在厚厚的胸罩內再加墊囉！」嘩，日本胸罩的神奇之處，就是冇身材都可以變警鐘胸！轉頭問店長J'Zk，為甚麼當起女僕來？多年來Cosplay玩得出神入化的他，希望改變大家對男扮女裝的看法，J'Zk還說，他們不會像女僕Cafe那樣，冷落那些「御宅毒男」，而且女生來Newtype玩，會較易融入。但大家謹記要守規矩，不可偷拍或竊錄，不可有身體接觸，不可說髒話，亦不可侮辱他們……當然啦，人哋都是打份工o者，尊重是來這裏玩的基本條件。

Newtype

地址：東京都千代田區外神田3-7-12 イサミヤ第8ビル3F

營業時間：6:00pm~11:00pm（星期四），11:00pm~5:00am（星期五、六），

　　　　　5:00pm~11:00pm（星期日）

簽證：持BNO及特區護照均毋須簽證

旅行團：東京+伊豆熱海 2晚國際殿堂級品牌Four Seasons Hotel東京5天豪華溫泉之旅（JTO05V），乘搭日本航空，$7,399起。查詢：2928 8882（永安旅遊）

套票：東京自遊行3至5天套票，$3,189起。

天氣：3月氣溫約5℃~13℃

貨幣：¥100約兌HK$8.6