和幾位職場主婦茶敍，誰知她們未坐低已經呻到樹葉都落埋，呻乜嘢？咪菲傭囉。

O太太說：「一直以來，我都是用本地女傭，雖然比較貴，月薪近萬；但勝在煮飯啱口味，而且不用留宿，省卻了工人房。這女傭跟了我好幾年，一向盡責勤奮，但當她的孩子從內地申請了來港定居之後，噩夢便開始了，天天遲到早退，成日告假，搞到我的時間表亂晒……你知依家啲細路幾多嘢要學啦？最後惟有忍痛炒魷算了。誰知道換了個菲傭，嚟到乜都唔識做……隻左眼的視力仲有問題添……唉，咁都可以過到骨嚟香港打工？你話係邊個嘅責任呢？」

C太太接口道：「唔識做嘢最多辛苦啲，我個菲傭居然趁我哋返晒工，入我房偷嘢添，好在我老公無意中在網上監控系統見到，錄低晒報警拉人，拉咗又點吖，咪要等兩三個月先至有新工人用？個代理都知道佢哋有責任，好主動咁介紹一啲完咗約嘅菲傭畀我試吓工。點知個個試一、兩日就拜拜，我一個禮拜換咗7個工人，仲慘過自己做呀！」

M太太話：「未算慘，我家裏有兩個菲傭，一個精，一個蠢，精嗰個大膽到……靜雞雞收埋嚟香港玩嘅兒子喺工人房住，我發現咗當然馬上炒佢魷魚啦，點知再請一個返嚟，又鍾意偷嘢……再換一個，蠢到加零一，乜都唔識做……」

好工人真難求！

註冊女中醫