卡通人物跟數碼相機Crossover屢見不鮮，Hello Kitty、米奇、多啦A夢等都曾經出過。今次Casio卻選擇同本土出品的麥兜玩Crossover，禮品多多之餘，更首次在相機內預載3款麥兜動態影像，讓用家自由發揮，將會郁會走的麥兜加入你的相片中，送畀女友或心儀對象，有創意之餘，亦夠誠意。
冧招一：限量版夠矜貴
揀情人節禮物，唔一定吓吓送花送名牌手袋，一份全球限量發售的禮物，同樣能夠表現你的心思和重視。Casio EX-Z90×Mcdull特別版相機套裝，全球限量發行999套，拎出街冇咁易同人撞款。值得一提的是，今次的限量版套裝幾乎可以用個「抵」字來形容，二千頭的售價，已經包括了燙上麥兜頭像的EX-Z90特別版相機、麥兜紅噹噹相機袋、毛公仔連相架、相機手繩及限量版證書一張，Cute到爆燈。送多個貼士畀大家，若然能在送的時候補上一句：「部相機係限量版嚟，同你一樣咁矜貴！」你話對方邊有可能唔冧？
冧招二：麥兜動態合照
EX-Z90特別版預載了有聲有畫的麥兜開機畫面，包保睇到嘩嘩聲。仲嫌未夠驚喜？EX-Z90具備趣味動畫拼貼功能，即是先拍一張靜態相片，然後將會郁的圖案隨意加入相片中任何位置，仲可以放大縮細，自製動態照片。話明係麥兜特別版，所以相機已預載3款麥兜動態影像，包括「麥兜練功響噹噹」、「麥兜可愛打瞌睡」和「Mcdull, Run Run Run」。男友可先做定手腳，等她收到禮物開機後，便看到你的事先拍下與麥兜的動態合照，這份獨一無二的驚喜，任何女性都難以招架。
冧招三：冧爆心形對焦框
即使有麥兜坐鎮，但若然相機太難用，到頭來被放埋一邊都係得物無所用。EX-Z90就勝在簡單易用，具備1,210萬像素、3倍光學變焦、2.7吋大屏幕之餘，仲有32種Best Shot模式，又有Easy Mode簡易模式，連細路仔都識用。女生們最喜愛的12級美顏模式當然有提供，仲有鮮明/除霧功能、夜景防震、智能逆光、720p高清拍片等，一定影到主角靚一靚。另外，此機提供了星形、薑餅人形、蠟燭等多款圖案對焦框，仲有勁冧的心形圖案，面貼面影合照，皆大歡喜！
規格表
有效像素：1,210萬 光學變焦：3倍
顯示屏：2.7吋Super Clear LCD
體積：89.7×51.7×19.4mm 重量：102g
撰文：陳若冰 攝影：陳世昌 查詢電話：2926 2300