羅凱珊（Kama）昨日着上紅色旗袍出席MegaBox活動，與打扮可愛老虎造型的BB打成一片。她表示今次是首個有關新年的活動，而手上有幾個工作傾談中，會在香港度過新年，但之前會再飛台灣。被問到台灣發展如何？她說：「幾好，不過台灣工作好緊張，而且時間好長，佢哋鍾意啲性感女。（你會否大解放？）依家冬天，都唔會特別性感，如工作需要性感過在香港都無所謂，底線是三點不露。」

問她有人斟拍偶像劇嗎？她說：「返港前老闆同我講，有人搵我拍劇，問我有冇興趣。（最想同邊位台灣男星合作？）我想同女星合作多啲，例如小S（徐熙娣），我好鍾意佢，覺得佢好真好直。（驚唔驚畀佢玩？）我都無乜嘢畀人玩。曾愷玹亦都好欣賞，覺得佢好靚女。（台灣男星呢？）冇，個個都咁靚仔，唔認得啲人。」