前女騎師江碧蕙婚後相夫教子，育有兩子，本隨丈夫李格力到法國定居，兩年多前又舉家移居新加坡，現湊仔為樂，大仔李國銘八歲，細仔李國寶五歲，兩個有時會爭寵呷醋，但她獎罰分明，她說：「哥哥好錫細佬，我亦唔會偏心，每次有事出埠，都會一人一份禮物，所以佢哋有時都想媽咪唔喺屋企，因為每次返嚟都有禮物收！」

早前細仔生日，冇搞生日會，一家人慶祝已開心，她說：「我哋喺屋企切蛋糕，我個人好公平，兩兄弟邊個生日都會有禮物，咁樣佢哋就唔會jealous。」她又予兒子很大自由度，從來不給予壓力，讓他們作多方面嘗試，她說：「兩個性格好極端，大仔較為好動，鍾意講嘢，除非係發燒同喉嚨痛就會收聲，連興趣班都揀打鼓踢波，細仔偏靜，鍾意畫畫同打golf。」但她要兩個兒子學跆拳道，因為可以訓練記憶力。