楊穎（Angelababy）與諸葛梓岐（Marie）先後進軍日本，而Angelababy先拔頭籌，成功發圍，但Marie亦不甘示弱，明年在當地搶先出碟，飲頭啖湯，而Angelababy因日文不靈光，押後出碟。

三月再戰貓步

Angelababy與Marie在09年可謂豐收的一年，二人不但在港站穩陣腳，更成功簽約日本經理人公司，九月時更為Tokyo Girls Week行騷，而Angelababy則打頭陣出場，地位明顯較Marie超然。所謂新一年新開始，Marie一於發力出擊，要在2010年於日本有所作為，二人亦會在明年三月的Tokyo Girls Week再埋身一戰較高下，Marie更會搶先飲頭啖湯推出個人唱片，而Angelababy卻因日本公司覺得她日文不靈光而押後出碟。

Baby努力惡補日文，現在簡單溝通都可以。

諸葛梓岐明年發圍，在日本推出日文碟。（資料圖片）

學日文先爆粗

Angelababy經理人Kim在電話中亦坦承此事，她表示Angelababy現正惡補日文，希望以後能全力向日本藝能界發展，並說：「佢喺日本剛開始，連一句日文都唔識，佢學日文係由粗口開始，依家簡單溝通係OK，但未至於講得流利，不過佢好聰明，學得好快，日文進步好多，依家去日本工作，佢仲會幫同事做翻譯添！我好希望佢可以喺電影方面發展，慢慢嚟，唔急得，總之Angelababy唔會令香港人失望！」

文：名人組