性感o靚模鍾蕙芝（Lavina）自稱對自己的高貴大方形象感到厭悶，明年希望改變形象，走性感前衞路線，更升呢自比Lady GaGa，指香港人可以接受外國人的性感，卻對她處處批評。
前晚Lady GaGa全新專輯Fame Monster在中環舉行一個發布派對，雖然主角Lady GaGa沒有到場，由於大會安排了一名「有料」外籍女模穿着低胸傘裙扮Lady GaGa，並頻頻烏低身拋胸，結果身穿谷胸連身裙出席的Lavina明顯被搶風頭，不敵「過江龍」。事後，Lavina大方表示早前亦扮過Lady GaGa，是晚以嘉賓身份出席，故不介意被搶風頭。
打算染粉紅金髮
Lavina並大讚Lady GaGa敢作敢為，是樂壇型人，她說：「佢着條底褲出嚟都好有型，其實我都夠膽，可以好爆，以前失戀都試過將頭髮剪到得番吋幾，一隻耳珠釘七個耳孔。我對自己依家個形象都睇到悶，好想染番個粉紅金色頭髮，不過都要問過公司，因為係公司幫我塑造呢個高貴大方形象。」
望港人放寬尺度
Lavina又說Lady GaGa經常以性感示人，卻不會招來批評，反而自己卻經常遭受狠批，她說：「中國人始終比較保守啲，對外國人尺度寬啲，自己又唔係外國人，希望香港人可以接受多啲外國文化，吸收多啲，理解吓sexy都可以好有型。」此外，前晚有不少名人明星撐場，包括新香蕉俱樂部、設計師Edina和Daniam等，一班o靚模如Rainbow等亦有到場，各模均在寒風下露出長腿、手臂等，果然愛靚唔愛命！
文：名人組