聖誕節就到，燈飾隨處可見，唔少人會拎部單反相機出來扮專業，但Pro歸Pro，笨重累贅卻是實話。計我話影靚相，不如用最新手機SoftBank 940SH，唔單止有美顏模式，仲首創連拍100張相，就算你女朋友「追趕跑跳碰」都影到靚一靚！

快慢隨你鍾意

手機連拍唔係高科技，只不過以前最多只有3~5fps，冇乜實際作用。今次940SH就配備全新ProPix圖像處理器，有效提升儲相速度，可1秒連拍45張相，若按下快門唔放，更可將連拍數量提升至100張，就算肉眼睇唔清楚的事物，好似篤爆氣球、子彈橫飛等都原形畢露。惟注意45fps連拍時解像度只有QVGA質素，要高質就要轉番4,000×3,000@3fps，速度有多級調校，快慢隨你鍾意。

放大圖片	開盡45fps試影Model由右行到左，成像算實淨，鬼影問題亦唔嚴重，以高速連拍來說絕對收貨。	放大圖片
放大圖片	放大圖片	放大圖片

豐富拍攝模式

夜晚影相最忌黑麻麻，這方面940SH亦照顧周到，備有LED燈提供基本補光，還支援ISO 12,800超高感光度同三重防手震，保證唔會「鬆郁朦」！就算返入室內，佢亦大把嘢玩，好似日系機今季必備美顏模式，就有齊美白、大眼仔、瘦面3個效果，而且每一項又分3個程度，即使唔化妝都靚爆鏡。其他影相功能包括自動對焦、臉部追蹤、微笑快門、防手震、SCN場景及人像搜圖等，功能多到一日都玩唔晒！

Sharp代工手機都用CCD感光元件，940SH亦唔例外。	外屏幕有成1.4吋，睇時間、短訊好清晰。	若以最高質素拍攝，每張相片容量有成2~3MB，建議買多張microSD較穩陣。
原來電池容量只有770mAH，怪不得咁快冇電。

突破上網枷鎖

機身沿用經典旋屏摺疊式設計，厚度僅有16mm，掀開上蓋會發現屏幕升呢至3.4吋，配合FWVGA解像度及Multi-Touch技術，睇相真係又清又方便。940SH另一賣點是破天荒支援Wi-Fi無線制式，以往日系機因為SIM Lock關係而上唔到網，但如今能睇到網頁讀到Flash，一解過往多年弊病。但用家一定要注意，就算唔上網唔傾電話，940SH電池都只夠影50張相左右（最高解像度），要就住影唔得痛快！

影完相後可記低每張面孔，日後透過「人像搜圖」就能搵番所有被攝者相片。	除了3fps及45fps，還可任揀多個連拍速度，但記住速度愈高，質素愈低。	日系水貨機終於上到網，呢個畫面Fans等咗好多年！

功能表

制式︰GSM三頻、WCDMA

體積︰111×51×16mm

重量︰約130g

內屏幕︰3.4吋1,677萬色TFT、480×854解像度

外屏幕︰1.4吋單色、64×192解像度

鏡頭︰1,210萬像素CCD

記憶體︰內置220MB，支援microSDHC記憶卡（最高16GB）

對外連接︰藍芽2.1、USB 2.0、Wi-Fi

通話時間︰210分鐘（GSM）、200分鐘（3G）

備用時間︰300小時（GSM）、340小時（3G）

撰文︰陳志滔

攝影︰林資凱

模特兒︰Ching（Angel Cast）

查詢電話︰2374 0618