許太李嘉欣出席慈善活動，更即場織愛心冷帽送給小朋友，自言很喜歡小朋友的她現正與老公許晉亨研究生育大計，又笑言已屆高齡，故不用擔心會成為高齡產婦！

昨日李嘉欣身穿Chanel連身冷裙出席「救助兒童會織善冷帽」慈善義賣揭幕活動，她更即場示範織冷帽，不過技術明顯生硬。嘉欣在台上笑言很喜歡小朋友，至於被司儀問到生育大計？她就透露計劃中。事後她自爆曾織了兩條頸巾送給老公：「兩次都係情人節，第一條用隻熊仔箍住J同M（嘉欣與許晉亨的英文名字頭為M和J），佢好鍾意，珍而重之當係寶。」

許晉亨	嘉欣自爆織了兩條頸巾冧老公。	嘉欣等人出席慈善活動。

互送小禮物

問到聖誕會送甚麼給老公？嘉欣笑說：「冇諗，其實剛剛過咗結婚周年，不過我同佢都冇買禮物畀對方，（老夫老妻冇情趣？）我哋平時已經好多情趣，大家都成日送小禮物畀對方，好似我啱啱先重錘出擊送咗隻手錶畀佢，唔需要等節日先送，佢最鍾意手錶，因為佢想掌握我每一分每一秒！」實行肉麻當飯食。

鍾意小朋友

記者笑言她可以送一個BB氹老公開心？她聽罷即笑說：「BB呢樣嘢係互送，我鍾意小朋友，不過係鍾意玩人哋啲小朋友，（怕唔怕再唔生就高齡？）依家已經好高，仲有乜好擔心？（會否尋求醫生幫忙？）如果好鍾意就會，但依家屋企又冇壓力，先生亦冇講。」她又謂近日與老公分隔兩地，她即將亦要飛到內地多個城市工作，她笑說：「勤力啲做嘢送多啲禮物畀佢，大家互相氹對方囉！」嘉欣更笑言「小別勝新婚」，所以近來會美化老公。

文：名人組