煲呔於施政報告話，要活化全港空置多時的工廠大廈，又話提出四項措施，跟住即刻有政府擦鞋官員話會幫手制訂一籃子方案，以求做到甚麼「快、狠、準」。查實工廠大廈，有腦的香港市民晨早已經多方面活化，煲呔今年先諗到真係慢人十拍，觸覺一啲都唔敏銳，成日掛住餵錦鯉，多啲落區巡吓啦！

撰文：鄧善文 攝影：梁偉德（部分）

唯一棒壘佔地六千幾呎，是香港首個室內棒球場。	棒球場分有投球區同擊球區，投球區設有九宮格板供練習控球，而擊球區則有發球機，可以練習擊球。	負責人Owen表示，活化廠廈政策公布後，全區廠廈租盤全線封盤，他料年半後續租約時，會被業主大幅加租，到時可能被迫結業，真係多謝煲呔唔少！

6,000多呎工廈變室內棒球場

雖然棒球在香港甚少人玩，無睇過漫畫《Touch》都唔知原來咁好玩，不過，有人竟然諗到在新蒲崗一間廠廈之內，設立了「唯一棒壘」，是香港首個室內棒球場，識棒球的朋友可以上去練波，唔識就可以上去試玩，滿足人人需求。這裏佔地六千多呎，分有投球區同擊球區，投球區設有《筋肉擂台》式九宮格，可以練習自己的眼界和力度；擊球區則設有自動發球機，擁有九段變速，最高投球速度更達100公里，同黑夜亡命小巴車速差唔多。另外，亦設有棒球用品專賣區，全部由日本及台灣入口，唔識打都可以買件日本職棒波衫扮去咗甲子園！

001>變劇社 工廠大廈地方夠大，租金夠平，最適合一些被政府睇唔起的小劇團或獨立文化團體，在新蒲崗就有廠廈改裝作排練室，有劇開就自己用，無劇開就借出畀人練跳舞。	002>變私房菜 家陣地舖咁貴，就算去到「山旮旯」，想做食肆的朋友都難以維皮，聰明的朋友就開始搞上樓私房菜，而城中名廚Ricky Cheung更早在多年前於柴灣工廈中設私房法國料理，沒靠政府都能闖出名堂。	003>變「殯儀館」 政府成日宣傳要發展六大優勢產業，成日得個講字，不如加埋殯儀業入去，好似葵涌有不少廠廈都攞正牌改裝為「殯儀館」，不過是寵物殯儀館，由喪禮到火化到寵物靈位一站式服務，方便不少主人。

查詢電話：9084 3864

004>變影樓 政府對文化出版事業一向唔重視，可供租用的影樓影棚少之又少，不少攝影師惟有自設Studio方便工作，大部分都看中柴灣工業大廈地方見使，所以如今大廈內七成租客都是攝影師，也是追星族及狗仔隊駐紮要點。	005>變藝廊 藝術家無處於市區容身，惟有於落腳於火炭工業區。今日火炭已經成為像北京798藝術區，吸引不少愛好者參觀，更成為香港一個另類旅遊點，可惜田少和旅發局唔知，仲當迪士尼係寶。	006>變傢俬城 香港工業北移多年，所以地點偏僻的香港仔海怡工貿樓高約廿層，近九成都是傢俬店，其餘一成就是名店Outlet，如果大家依家先諗活化，相信這大廈所有單位一早已盡丟空，甚至被某複姓師傅誤傳為猛鬼工廈。