衛志豪（Micheal）、黃芳雯（Paula）這對有線娛樂新聞台的拍檔，笑言每星期都會一齊做節目，默契十足；之不過一講起食，大師兄、小師妹口味大不同，Micheal嗜食西餐，像意大利菜，Paula則鍾情濃味的印度菜。兩人今次來到灣仔這所新餐廳，就可以「各取所需」，就算心多多搶食亦得！

滿足心多食客

「Duetto」前身是印度餐廳Viceroy，其對面則是同公司的意大利餐廳Milano，餐廳所屬公司發現兩邊食客鍾意互相柯打食物，故搞搞新意思，開新餐廳來個「二重奏」，取名Duet的意大利文Duetto。

雜錦頭盤　$135 兩國小食Crossover，Paula最鍾意食印式燒雞：「香料味夠濃，雞肉入口好Juicy。」Micheal則說：「似小布袋的Burrata外形好Cute，味道就比平時的Mozzarella淡啲，質地Creamy啲。」	炸釀扁豆薯餅配雞心豆 $45 香脆薯餅內釀入扁豆，味道幽香，食時記緊將雞心豆、拌碟醬汁一齊放入口，即嘗多重口感。	龍蝦薄餅 $165Micheal激讚：「龍蝦肉好彈牙，車厘茄夠鮮甜，加埋茄醬、芝士真係無得彈，鍾意佢配料簡單，味道清新。」原來每個薄餅都用了原隻波士頓龍蝦（約重磅半）炮製，可謂斤両十足。

Paula大讚餐廳有心思：「咁樣設計，可滿足晒意大利菜、印度菜的粉絲，就算想試勻兩樣都得，真係唔怕心多多！」Micheal表示：「我比較鍾意食西餐，譬如牛扒、鵝肝、龍蝦湯等，薄餅、意大利飯都啱口味！而Paula就愛濃味食物，好似印度菜咁，Naan Bread及Tandoori Chicken都係必食！」

大蝦特闊寬條麵$188 大蝦經乾葱、蒜頭煎香，而特闊寬條麵則用上番茄、意式青瓜、龍蝦湯、白汁等燴煮，兩者同樣鮮味無窮。	戶外用餐區地方偌大，面對海天一色，開餐時特別心曠神怡。	餐廳分成幾部分，例如較寬敞、富現代感的大廳取名Sole，內裏放了意、印的特色擺設，以及掛上意大利的風景相，地道風味十足。

味道正宗不Fusion

雖然大玩「二重奏」，但店方表示食客可以放心：「絕對唔係賣Fusion菜，無論係煮法、味道都會跟足傳統，意大利菜、印度菜都分得清清楚楚，只係有新的Presentation。」的確，印度菜由印度廚師主理，而且香料亦從當地入口；另一方面又從外國空運肉類、海鮮到來，用料靚，炮製着重原汁原味的意大利菜最啱。

餐廳分為酒吧、兩個用膳區及露天位置，而每個部分都花過心思，例如較寬敞、富現代感的大廳取名Sole，而面積較小、氣氛較Moody的則是Luna，露天位當然亦不輸蝕，有靚絕維港做背景，坐在戶外椅子上開餐，實在悠然自得，Micheal更說：「仲以為去咗Resort度假。」

衛志豪近況

有線娛樂新聞台主播，曾參與電影、電視劇演出，演出經驗豐富。身為明星足球隊成員，近期卻因腳傷而停賽，連早前去民丹島拍節目亦無法盡情玩。

黃芳雯小檔

小時候曾參與兒童節目演出，大學畢業後當上空姐，至去年加入有線電視，成為娛樂新聞台「小師妹」主播。

撰文：楊淑英　　攝影：胡淑儀

衛志豪髮型：Patrick So@HH hair˙nail（IL COLPO GROUP） 查詢電話：2598 1222