收費電視台主播史澤雅（Sonia）最愛潮拜，去過米蘭時裝展，唔止見盡頂級品牌新作，就連當地美食亦一併愛上了。所以，當她踏進灣仔新開的意大利「快餐店」時，即被櫃內的意式美食所吸引，特別係坊間少見的炸飯球（Arancino），食完也大叫「Bravo！」（好味咁解）。

西西里名產 蘸茄汁最正

別看這女主播身形甚Fit，其實食量好驚人！Sonia自爆：「平日要做現場節目，會消耗好多體力！所以，一食飯就會同其他主播開大餐，諗起都覺得開心！」唔止響香港會狂食，原來去到外國都一樣，像Sonia連續去了幾年米蘭時裝展，睇Show做嘢之餘，亦有抽空品嘗美食：「我最鍾意Panini，烘熱咗外面脆脆哋，咬開仲有好多芝士呀！新鮮炮製的Pizza，餅底夠晒Crispy，亦係Must Eat Item！」

Caprese $45 百食不厭的經典組合：水牛芝士配番茄，再簡單地澆點橄欖油、加點百里香，滋味無比。	Piadia $50 來自意大利中部，先將當地進口的餅皮略煎，再加入不同餡料，像這款有番茄、雜肉腸及水牛芝士，烘熱後外脆內軟，還跟餡料混成一體，甚為特別。	Assorted cold cuts dish $80（小） 集合了巴馬火腿、火腿、香腸及莎樂美腸等，配杯餐酒慢慢歎，可盡情輕鬆一下。

今次來到Magia，Sonia即時報料話：「餐廳老闆係意大利人，所以食材、烹調方法全部原裝入口，除咗Pizza，仲有Pasta、Lasagne及Cold Cut等，選擇都幾多。」不過，最吸引Sonia的應該是來自西西里島的Arancino，炸飯球釀入芝士，蘸點番茄汁最好味，另外，意國中部的美食Piadia亦不錯，外皮煎過咬落香脆，夾着不同餡料，最啱做輕盈午餐。

Pizza $25/件 薄餅呈長方形，餅底厚薄適中，烘一烘更為美味，另有多種款式選擇。

Arancino $30/3個 坊間少見的意式小食，意大利飯包着羅勒、芝士，然後香炸而成，熱辣辣入口，仲可以見到飯粒內混有芝士絲，「芝」味無窮。

新書晒時裝見聞

說Magia是「快餐店」，因地方的骰，不少食客都愛外賣食物，如果想堂食的話，亦可安坐由Philippe Starck設計的名椅開餐。環顧四周，全店以白色為主調，綴以幾幅掛畫，甚為清雅，而牆上的一大塊鏡子，正好用來增加空間感。

看小店選用Philippe Starck設計的名牌椅，就知甚具品味，坐着開餐感覺Upgrade。

Sonia推出了新書《潮拜。史澤雅》，將由細到大的時裝見聞記錄下來。除普通版外，還有書展專賣的限量版。

Sonia邊食邊談起她的新書：「兩個月內要寫完本書，真係好辛苦，但又好有滿足感。本書裏面會有自己由細到大的時裝見聞，當然包括去米蘭時裝展的趣事，好似見到Burberry個靚仔設計師Christoper Bailey、每年響名店街都幾乎買到破產等等。」

史澤雅小檔案

有線娛樂新聞台主播、節目《最．潮拜》主持，兼為報章專欄作家，寫盡各大時裝、名牌。自小對時裝觸覺敏銳，剛推出其心血傑作《潮拜．史澤雅》。

撰文：楊淑英 　攝影：黎劍華（部分）

查詢電話：2529 2926