向來有「魅力王」之稱的尊尼特普，於新片《大犯罪家》飾演美國三十年代大蕭條期間的傳奇人物──銀行大盜尊狄凌格，自爆廿五年來都像俠盜羅賓漢一樣，不過只是劫富，未有濟貧！

■Otto Tang洛杉磯直擊

記者＝記　尊尼特普＝尊

記：你點睇尊狄凌格？

尊：覺得佢係一名罪犯，坐咗十年監後，明白亦決定到自己要做的事情。

記：期望觀眾睇完套戲學到乜？

尊：希望佢哋知道尊狄凌格同理解佢所做嘅事。雖然認為佢係罪犯，但我唔會話佢係「人民公敵」，但可惜外界一直都當作係。

記：三十年代的美國有乜吸引你？

尊：我鍾意當時嘅時裝風格，男男女女嘅打扮，都能表現個人，十足裝飾藝術時代。

大讚對手

記：瑪莉安歌迪雅飾演你女友，覺得對方如何？

尊：佢真係好有才華，一對眼睛好會做戲，亦好欣賞佢嘅投入，好鍾意佢嘅英文口音！

記：咁演特務探員佩維斯嘅基斯頓比爾呢？

尊：佢好掂！當我知道同佢合作時好興奮，可惜我哋只有一場同場戲。佢以敬重佩維斯嘅態度嚟演繹，真係做得好似，令我印象好深，好期待再次合作。

記：有冇幻想過做劫富濟貧「羅賓漢」式英雄？

尊：我呢廿五年來咪做緊囉！真㗎，我以前好霉，地盤、印刷、入油等都做過，成隻牛咁只賺得少少，直到八六年入行，就開始「劫富」！哈哈！

感激fans

記：作為當今最搶手演員，如果有機會好似大盜入銀行咁唔會畀人發現，你最想去邊？

尊：咁正？我一定會同仔女去迪士尼玩，玩晒全部機動遊戲。同佢哋去玩真係唔得了，佢哋分分鐘搵唔到阿爸！

記：入行咁耐，fans仍然為你尖叫，感覺如何？

尊：我真係無話可說，實在非常非常多謝佢哋，冇佢哋我唔會有今日。

記：係咪真係有加勒比海盜4出現？

尊：都有機會！我哋正搞緊劇本，如果有好劇本，一定會開拍。

瑪莉安歌迪雅獲偶像邀拍戲

演尊狄凌格愛人貝莉的法國女星瑪莉安歌迪雅，憑《粉紅色的一生》封金像影后後事業起飛，《大》導演米高曼亦主動邀她合作，她說：「我美國嘅經理人話米高曼想見我，起初都唔信，我係佢fans，睇晒佢啲戲！」她盛讚米高注重細節，拍攝時又給她充足資料，讓她代入故事。

對於兩位拍檔基斯頓和尊尼，她指前者為電影帶來深度和實感，又大讚尊尼說：「佢係個好特別嘅人同埋君子，好尊重所有人同事，佢亦係好出色同入戲嘅演員，有一種好特別嘅特質，唔知點解釋，但你自然會感受到。」將在新歌舞片《Nine》開金口唱兩首歌的她，稍後會拍《蝙蝠俠》導演基斯杜化洛倫新科幻片《Inception》，她不忘大讚對方是天才。

文：外娛組