「人要按摩，連苦瓜都要！」係周中師傅講嘅！今次師傅同靚女模特兒Carmen來到馬來西亞搵食，仲親自開壇，煮番餐給大家試食，大展身手做出「蘇菲亞」……豉椒苦瓜炒牛肉魚蛋是也。師傅更賣大包講秘訣，原來要去掉苦瓜的苦澀味，係要幫佢做按摩！按吓、炒吓又講吓，唔好講咁多，都係嗰句：周中廚房，食咗先講！

為蘇菲亞 又按又唧

一向不太喜歡苦瓜又苦又澀的味道，周中師傅立即說：「你都未同佢按摩，梗係苦啦！人要按摩，苦瓜都要，加埋鹽同佢按，就會Fit晒㗎啦！」師傅幫苦瓜按呀按，愈按愈投入，師傅，你唔係按緊靚女喎……轉頭又去幫魚肉做推拿，在他手上撻一撻、唧一唧，立即變成圓潤的魚蛋，勁！

終於開爐了，只見師傅拿着鑊拋兩拋，加入材料調味炒兩炒即成，好有大師功架，他笑說現在多做烹飪顧問，已很少拿鑊鏟，能試他的手勢實屬難得。師傅還替這碟豉椒苦瓜炒牛肉魚蛋命名為「蘇菲亞」，其實這是旅行社經理的名字，咁識冧人，經理即刻心都甜晒。

師傅平時畀得分多，今次到大家評一評這碟「蘇菲亞」了。望着苦瓜心裏一寒，周中見我面有難色，說：「唔苦架，食啦！」終於畀面吃了一口，咦！真係唔苦喎！甘甘的味道加上豉椒的濃香，滑滑的牛肉兼彈牙的魚蛋，大家讚不絕口，我畀十分！繼而開始搶食，最後連汁到撈埋，絕對唔會吐去垃圾桶，放心啦。

加鹽幫苦瓜做按摩，原來可以去掉苦澀味。	開爐啦！平時只見師傅做評判，今次為我們煮飯，認真難得。	師傅炮製的「蘇菲亞」，其實是豉椒苦瓜炒牛肉魚蛋，超級好味，我畀十分！

食瀨尿蝦 唔使拆殼

除了「蘇菲亞」外，今次借出廚房讓我們玩「餐」飽的新海鮮飯店，還有不少招牌菜，好像咖喱魚頭，用上比男生的手掌更大的石斑魚頭，半邊已夠十人分，大得驚人！老闆更放棄馬拉的清淡咖喱，轉用印度入口的BaBa咖喱，又落埋關丹梅香鹹魚，令味道更加濃郁，魚頭吸收了醬汁，微辣而香口，連師傅都食到唔停口。

再來瀨尿蝦，自問拆蝦殼是弱項，飯店知道客人怕麻煩，索性拆肉再炸到香脆，加個鮮奶牛油芡汁回鑊，醬汁包圍着炸，食落啖啖肉，不用拆殼，好像吃咕嚕肉般，食得甚痛快！

新海鮮生鍋海鮮飯店

地址：53-7, Jalan Barat ,Off Jalan Imbi, Kuala Lumpur

營業時間：4:00pm~2:00am（逢星期二休息）

表面猶如咕嚕肉，原來是鮮奶瀨尿蝦，無殼啖啖肉，香脆非常，RM$25（約HK$55）。	咖喱魚頭用上印度BaBa咖喱，特別濃郁好味，RM$35起（約HK$77）。	魚頭用上比男生手掌更大的石斑，絕無花假。

秘製藥材 肉骨茶

大牌檔格局的新華肉骨茶，由老闆親自鮮熬，加入大量材料，令湯底更香更濃，先用竹蔗、豬骨、玉竹、雞腳等熬好，加入秘製藥材，包括當歸、陳皮、八角、杞子、丁香、桂皮、甘草、花椒及蒜頭等，再煲4小時以上，加入新鮮靚豬腩肉才出爐，避免煲到爛晒無肉食，用瓦煲保溫之餘更有風味，老闆更強調：「肉骨茶日日重新煲過，材料不會隔夜，夠晒新鮮！」

自問頗怕肉骨茶的藥味，但新華的肉骨茶有藥味得來不刺鼻，入口香濃像老火湯，腩肉可口不肥膩。

新華肉骨茶

地址：Qp 27, Queen's park Retail Center, Jalan Shelley, Kuala Lumpur

營業時間：11:00am~2:00pm，5:00pm~11:00pm

肉骨茶用老闆的秘方當歸、八角、杞子、丁香、桂皮等N種材料熬成，周中都話正。	啖啖豬腩肉的肉骨茶，湯濃肉嫩，RM$9起（約HK$20）。	新華肉骨茶，早午晚均有肉骨茶供應。

遨遊備忘

簽證：持BNO或特區護照均毋須簽證

貨幣：RM1約兌HK$2.2

天氣：6月氣溫約24℃~33℃

旅行團：周中師傅馬來西亞美食5天之旅（PEN05X），7月14日出發，團費由$4,999起。

查詢：2928 8882

特派記者：羅安琪

鳴謝︰永安旅遊、Sheraton Imperial Kuala Lumpur Hotel、Discover Orient Holidays Snd Bhd