陳冠希（Edison）的「無限期」復出論受盡外間非議，愛弟心切的陳見飛昨日為對方解釋從無說過「永遠」退出，更力撐細佬的說法起碼不會斷絕後路，並言弟弟跟女友楊永晴（Vincy）感情絕佳。

昨日陳見飛和葉翠翠於奧海城為歐洲內衣品牌Lytess示範塑身內衣，不過翠翠明顯較「身嬌肉貴」，以短裙、恤衫或外套遮蓋內衣，相比同場的陳見飛直接展示穿上塑身內衣後的瘦身效果，當然失色不少。

「做埋呢個step就得」

陳見飛行騷期間有點腳步浮浮，事後她解釋不是飲醉或不適，只是有點跣腳。她又透露會親到吉隆坡支持細佬Edison的新店開幕禮，並開心說：「今次細佬返嚟，我一有時間就過去佢度傾偈。（佢返嚟香港係咪好開心？）我都好開心！我覺得佢calm（冷靜）咗，返嚟做埋呢個step（指交代慾照事件）就差唔多。」

懶理阿嬌嫌道歉遲

至於Edison的「無限期」復出說法令人議論紛紛，陳見飛說：「一年前我已知佢係無限期，當時有啲報紙寫佢係『永遠』，係寫錯，但係當時有咁多嘢發生，所以我冇澄清，由得佢。」她續說「無限期」復出這說法是公平的，因不會閂了自己的後路。至於有傳Edison回港是為已宣布破產的父親撲水，她說：「我唔知，就算佢哋兩個傾過我都唔清楚。」對於慾照女主角之一的阿嬌（鍾欣桐）指Edison道歉太遲，陳見飛說：「No comment，佢有權想點諗就點諗。（Edison同Vincy嘅關係點？）Really good，感情穩定。」

葉翠翠在內衣外穿上小外套和短褲，失色不少。

翠翠雖穿上密實裝束，仍吸引不少拍友到場。

翠翠收藏百套內衣

另外，翠翠解釋是公司安排出騷的服裝，又自爆愛買內衣及泳衣，現已收藏近100套，故因此成為不少品牌的VIP。她又笑言未收過男士送贈的內衣，但寧願自己購買。

文：名人組