陳豪前日隔空向緋聞女友廖碧兒（Bernice）傳情，不但透露曾為伊人煮牛奶咖啡（Latte），更不抗拒與對方一起穿泳衣拍纖體廣告。昨日Bernice大發嬌嗔謂陳豪不了解其口味，但期待對方穿泳褲，大耍花槍！
Bernice昨日與汪圓圓為太古廣場2009春夏時裝展擔任模特兒示範新裝，前日陳豪出席活動時，透露曾為Bernice煮牛奶咖啡，昨日伊人聞言大發嬌嗔說︰「我唔飲得奶㗎！佢透過你哋講，我都透過你哋同番佢講我唔飲奶，不過公司嘅咖啡機七蚊杯，佢可能有幫我買過，我都有幫佢買過，有時仲買埋蛋撻。男仔講大話我會扣分，不過可能佢最近好鍾意咖啡，成日煮畀唔同人飲。」
被新片對白嚇一跳
雖然隔空投訴緋聞男友，不過提到陳豪謂不介意與伊人一起擔任纖體代言人時，Bernice坦言不介意為對方搭路︰「我知我間纖體公司無做男賓，不過我可以幫佢問吓，（佢話一齊着泳衣拍廣告要好貴？）佢做咗我經理人，幫我傾價？不過我唔介意一齊着，最緊要夠fit，我未見過佢着泳褲，（期待嗎？）叫佢參加港男囉！其實公司可以做一集請埋鄭嘉穎同林保怡一齊着，睇佢哋濕身、吹風，令大家開心吓。」另外，正為新片忙練武的她，透露新片中的對白會令觀眾耳目一新，連自己也感嘩然。
汪圓圓騷十級琴技
至於汪圓圓除了示範新裝外，還即席表演鋼琴才藝，獲姨甥女上台獻花，令她大感驚喜。自五歲開始習琴的圓圓，十三歲已考獲十級，不過首次公開演奏的她，仍大呼緊張︰「我未試過公開彈，姐夫勁過我，不過佢鍾意自己彈，唔鍾意合奏。我男朋友唔識彈琴，今日唔知佢有冇嚟睇我彈呢？」另外，母親節將至，圓圓謂會與母親過，不用陪男友媽媽，她說︰「我男友都見過媽咪，大家好熟。」圓圓並謂現時以模特兒工作為重，無意做鋼琴老師。
文：名人組