LG LH45顯示畫面快如F1

今年F1一級方程式賽車話題多多，身為F1合作夥伴嘅LG都一樣，啱啱出咗部快到似足F1賽車嘅新iDTV LH45，仲搵埋城中兩大索女Chrissie同Suki齊齊搖旗仔賀新機出爐。部電視快喺邊？就係用上TruMotion 200Hz技術，畫面顯示頻率達到每秒200格，就算睇快到好似F1賽車嘅電視畫面，都一樣顯示得非常順滑，無論車迷或者影音迷都覺得正！

4倍流暢度

好多大牌子新出嘅電視都支援全高清1,920×1,080p畫面兼且內置數碼廣播解碼器，呢部LG LH45都有齊以上規格，而且畫面顯示能力同附加功能更強。LH45嘅TruMotion 200Hz技術，顧名思義就係可以顯示到200Hz畫面，比起一般50Hz畫面快4倍，喺畫面同畫面之間插入新畫面，令流暢度提高，對賽車或足球比賽等高速移動畫面就最有用，唔會睇到好似偷格或瞬間轉移嘅「特效」。即場試睇LG所拍嘅F1宣傳片，對比番200Hz同一般嘅50Hz畫面，即時高下立見，電視畫面仲靚過遊戲嘅CG。

機側設有USB端子同HDMI v1.3端子，方便。	插入USB手指即會彈出相片、音樂同電影清單，今次更支援埋DivX-HD高清影片格式。	F1宣傳片中畫面好有速度感，LM45演繹得好好。

支援DivX高清片

用全高清電視插記憶卡或USB手指睇相、睇片，好多個牌子都做得到，但今時今日睇片當然係睇高清，有牌子支援高清攝錄機所用嘅AVCHD格式，而LH45就支援另一種網絡常見嘅DivX-HD高清影片格式，攤喺梳化用四、五十吋大電視睇片，點都舒服過匿喺睡房用廿吋電腦芒睇。LH45顯示質素相當好，主要由於轉用LG自家研發嘅IPS LCD顯示板，層次感強，效果拍得住Plasma；不過稍嫌內置場景模式未夠多，除咗基本嘅Cinema Mode、Sport Mode同埋Game Mode外，新加入就只有24p Real Cinema技術。至於音效表現，LH45算交足功課，採用改良咗嘅Clear Voice Ⅱ人聲演繹技術，可以根據電視節目或者電影效果而揀選13段唔同級數嘅人聲水平，唔怕畀環境聲淹沒晒。

試播《Speed Racer》BD片，畫面色彩豐富，而且超高速移動畫面都顯示得相當細膩。	發布會當日請咗兩位索女Chrissie同Suki坐鎮，加上展示實物原大F1賽車「模型」，安排得幾有氣勢。	LG LH45備有3個唔同尺寸型號。

規格表

尺 寸：42、47、55吋

解像度：1,920×1,080p

對比度：80,000:1

HDMI：3個

李英健試睇

全程睇F1賽車都咁靚

李英健除咗鬥車叻，對揀電視都幾有心得，佢話睇賽車呢啲咁高速度嘅比賽，電視畫面如果跟唔上而出現殘影，睇唔清F1賽車車身線條同尾翼嘅美感就認真嘥料；而好似LH45咁暢滑嘅畫面，就連車手嘅輕微犯錯都無所遁形；佢仲話如果LH45出到60吋咁大就最好。至於點睇今年F1，李英健就較睇好前幾站都表現出色嘅英國車手Button（畢頓）同德國車手Vettel（維度爾）！

撰文：布偉倫　攝影：張群生 查詢電話：3543 7777