古巨基與傅穎（Theresa），一個是公認唱得之人，一個則因唱功未成熟淚灑人前。雖然論唱功二人有距離，但二人對家庭及事業同樣執着，所以在這兩方面頗有共通點，算是圈中罕有默契的一對。
認真執着 要求高
對工作十分狂熱的Theresa，近期專注歌唱事業，未知是否對突如其來的壓力應付不了，表演期間失控痛哭，這是出自她對工作的認真及執着：「我喺澳門演出嗰次真係喊過，近排都唔知點解壓力會大咗咁多，我好緊張自己每次嘅表現，表演嗰時會諗好多嘢，如果一開始有粒音唔準，就會影響咗我整體表現，但係平時就冇問題㗎喎，所以我都要搵專業人士解決呢個心理問題！」
打機減壓仍專一
對自己同樣要求很高的基仔，卻懂得以適當的方法紓緩壓力，就是打機。獅子座的他就連打機也渴望成為長勝將軍，卻沒有獅子座的得一想二：「我打咗咁多年，都淨係會打一隻足球game㗎咋。」
低調基仔重承諾
入行多年的古巨基鮮有緋聞，來來去去就只有女助手Lorraine，雖然勇奪「最受歡迎男歌星獎」時，基仔情真意切的感激她，但當談到與對方的關係時，基仔還是不肯正面回應：「因為我好希望喺演藝工作方面可以留番少少空白位畀自己，其實唔單止唔想多提感情生活，就算我嘅家人都係，因為佢哋都係比較低調嘅人。」
之所以選擇在台上感激身邊人，他說：「我知道大家都好關心我嘅人生大事，因為當年攞新人獎嗰陣忘記多謝佢，所以就講笑話等攞男歌手獎嘅時候先多謝，雖然當時只係講笑，但因為我重視呢個承諾，所以我一定會實踐。」
Theresa冇特定要求
至於身為基仔後輩的Theresa，一樣緋聞不多，至今亦只有富家公子Neal而已。Theresa說：「依家唔係一個好嘅timing去拍拖，但我始終係廿幾歲嘅女仔，都會想拍拖。不過我又冇話想要一個點嘅男朋友，只要唔好矮過我就得，我都唔會expect太多，冇期望就冇失望。」
最壞打算住姑婆屋
Theresa自揭會是小鳥依人型的女友及老婆：「我如果有男朋友或老公，一定會咩都畀佢作主，因為我覺得自己喺工作上已經好tough，所以愛情上就想搵個人依靠。」Theresa亦笑謂曾擁有一顆恨嫁的心：「細個都恨有個老公，不過人愈大就愈覺得係個fantasy，因為難搵好老公，所以冇所謂啦。如果真係嫁唔出，咪搵幾個女仔好朋友住埋一齊囉！」
忙碌和低調的基仔，和另一半的壓力不能像正常人一般拍拖行街之餘，就連對方「正印」身份都未必可以公開，但基仔卻認為這樣並不算辛苦：「我覺得唔會辛苦，一定係本身性格都低調嘅人先會同我一齊，咁樣大家嘅相處就唔使點遷就。而且同得我拍拖嘅，一定唔會好多時間見面，所以我嘅另一半，都應該係工作狂。當有咁脗合嘅人出現嘅時候，呢個就係緣分。」
獅子仔愛照顧人
基仔不諱言二十多歲時已有成家的念頭，但人在江湖，一直都只得一個「恨」字：「我成日覺得自己如果無入行，一定係個早婚嘅人，有時見番啲同學仔結晒婚，心底裏都會好羨慕，但人生就係有好多嘢都預計唔到，尤其人生大事。」雖然成家立室願望一直拖住，但家庭在基仔心目中極具分量：「我淨係鍾意踎喺屋企，唔鍾意『躝』街，所以屋企對我好重要，家人可以話係我背後嘅動力。另一方面，屋企人有啲咩我都要孭晒上身，呢個可能同我係獅子座鍾意照顧人有關。」
文：葉晶晶、周慧心
攝：吳文聰、沈健程
場地：無印良品＠海港城
髮型：Vince Pang＠IL Colpo