人力資源招聘公司Selby Jennings最新研究顯示，有52%亞太區金融服務專業人士表示對未來12個月經濟前景有信心，較舊年嘅11%明顯上升；而亞太地區受訪者對就業市場嘅信心亦係全球最高，由舊年嘅28%升至47%。
至於對工作滿意度，就由舊年嘅50%略為下降到48%；對目前職位感到不滿意嘅人數，就由舊年嘅23%增加到36%。
調查又顯示，整個亞太地區接受調查嘅金融服務專業人士中，得45%今年有花紅，比舊年嘅58%有所下降。調查機構就話，疫情期間，好多金融服務機構業績都唔錯，隨住經濟復甦，預計出年花紅會達到更高水平。
所有接受調查地區之中，有82%亞太地區受訪者表示願意為更好工作機會而移民，比美國（64%）同歐洲（71%）願意移民人士多。調查又顯示，新加坡係亞太地區金融服務專業人士移民最理想嘅目的地。
唔知你對自己份工滿唔滿意呢？唔滿意？唔緊要，聽日記住準時返工！
嗱，不過咁，初出茅廬嘅新鮮人，有個機會等緊你啦。事關金融發展局推出金融服務業創職位計劃畢業生版（YOUTH），為年輕嘅大學畢業生創造200個金融服務業全職工作崗位，下周三起接受申請。合資格企業可申請資助僱用最多兩名近兩年畢業嘅大學生。每間企業可就每個合資格嘅新職位獲得每月最高一萬蚊薪金資助，為期12個月。
余絲韻