新冠肺炎令全球經濟百業蕭條，年底仲有雙糧出嘅公司都算係了不起！內地亦有企業成「疫」市奇葩，講緊嘅係京東集團（09618），日前宣布用兩年時間，將員工薪酬由平均14個月糧逐步加到16個月，即係直接加兩個月人工。
不過，今次加人工唔係全員實行，據報負責管理、項目經理，同產品和技術嘅職工人人有份，但基層嘅分揀員同埋配送員就有人落空，只有部分地區同工種嘅員工獲加薪。
其實內地科技公司早排（被監管盯上前）風頭勁旺，其他巨頭好似阿里巴巴（09988）、快手（01024）等早向員工應承出16個月糧。有分析話，京東依家先加人工係為咗挽留人才喎。
另邊廂，內地嘅券商就諗計慳皮，聽講班高層內地公幹搭飛機都降級轉坐經濟艙、火車要改搭二等座或硬臥火車座位，甚至由機場或火車站去目的地嘅交通費，都唔可以再報銷。
據報係內地當局向國有金融機構施壓，要求佢哋降低成本，所以先要諗計仔慳皮。除咗交通費，酒店津貼都要慳得就慳，每人每日嘅酒店津貼減200至700蚊人民幣不等，仲鼓勵高層共用酒店房，每人額外有50%的津貼。
有傳滙豐控股（00005）都計劃將公幹預算縮半，要求員工用多啲視像會議嚟取代長途商務旅程；渣打銀行亦打算大幅減少公幹開支。
余絲韻