絲絲講場：「大細路」商機巨 玩具商冀拓內地澳門
「買玩具」唔再係小朋友專利！喺香港代理LEGO的凱知樂國際（02122）看好「Kidult」市場增長潛力，去年逆市於朗豪坊開設主攻創新潮流及收藏玩具嘅kkplus，短短一年內再擴大店面兼開設概念店，首個周末營業額就突破100萬元，最大單嘅銷售發票，仲一次過買28件產品，埋單找數點都要有個「大人」首肯啩？
開設kkplus概念店
「Kidult」一字其實係kid（小孩）及adult（成人）的合體，指一個成年人童心未泯，又可解作「大細路」。凱知樂集團助理行政總裁及首席財務官洪誠明稱，據統計，全球市場每銷售5件玩具，就有其中一件係「Kidult」產品。以LEGO為例，呢類產品銷售佔比明顯較大。
而以往潮流玩具畀人嘅印象都比較男性化，所以kkplus決定打破舊有印象，旗下產品現時與50多個來自世界各地的品牌及15個本地品牌合作，針對不同口味的消費群，包括Tom & Jerry、SpongeBob及Street Fighter等，做到真正嘅老少咸宜。
既然潮玩市場有咁大發展空間，公司亦磨拳擦掌計劃到內地及澳門開設kkplus概念店。洪氏透露，雖然目前兩地都已經有商場營辦商同公司洽商開店，但仍要等香港與兩地恢復正常通關先會落實。
余絲韻