新冠肺炎疫情令到我哋嘅生活出現翻天覆地轉變，因社交隔離設施而出現的WFH（Work Form Home，在家工作）更可能在疫後維持，甚至成為新常態！據報，國際貨幣基金組織（IMF）就醞釀緊新改革，包括容許員工繼續選擇WFH，每星期可以有兩至三日在家工作。
總部位於華盛頓嘅IMF，由去年新冠疫情爆發以來就一直推行WFH。近日，隨着當地衞生部門規管放鬆，生活開始回復正常。據報喺其9月開始的試行計劃中，IMF無打算硬性規定啲員工要完全返去辦公室工作，而是容許員工每周可以有一定天數在家工作，員工之間可以共享辦公設施，即係WFH員工騰出的工作空間，可以讓返工的同事使用。如是者，咪可以慳到唔少工作空間出嚟，所以IMF考慮將兩座總部大樓嘅其中一座出售，不過呢一切仲係處於討論的初期，尚未有定案。
WFH最主要係慳番啲搭車時間，就算你有私家車，日日揸車返工放工都咪話唔辛苦，慳番出嚟嘅交通時間就可以做其他嘢，身心都健康啲；但當然，員工都要自律，唔好用返工時間「蛇王」！
呢頭IMF話研究改變工作模式，嗰頭全球最大資產管理公司貝萊德（BlackRock）行政總裁芬克就公開呼籲IMF同世界銀行「已經過時」，需要徹底改革，指呢啲國際機構與其借錢畀新興市場，促進佢哋嘅發展同經濟穩定，不如做佢哋嘅擔保人，吸引私人機構投資者嘅資金，去協助新興市場向綠色經濟轉型咁話。
余絲韻