數一數手指，香港人至少都有一年半冇去過外地旅行。部分惟有改去本地旅行，或用Staycation嚟滿足鋪「旅行癮」！有訂房網發現，6月第二個星期「本地旅行」的搜尋次數急增近四成，當中有65%搜索係來自30歲到40歲組別。
眼見香港社交距離措施逐步放寬，香港人開始積極安排「暑期活動」。根據Airbnb嘅內部數據，以6月份訂房數字嚟睇，千禧世代係最踴躍一群，年輕人嘅消費力真係唔可以睇少。
從今夏香港人喺Airbnb搜尋4人或5人住宿的次數分別上升54%及50%可見，相信大家都想同屋企人或者三五知己享受夏日。同寵物度假亦都唔錯，「接受寵物同行」成為香港人最熱門嘅搜尋條件之一，增幅超過四成。
本地遊帶旺經濟固然好，不過唔少亞洲國家都開始研究，係咪唔一定要等到病毒完全消失先可以通關呢？
泰國就已經重新開放布吉島，畀接種咗疫苗嘅旅遊人士。印度仲將國內航班運力由50%提高到65%。有亞洲經濟學家就講到，未來6到12個月有望放寬旅遊限制，仲話「呢種病毒不會完全消失，而係一種我哋要共存同埋管理嘅病毒 」。
根據航班追蹤公司OAG稱，航空業7月出現轉機，8月同9月嘅預測更加穩健，估計到聖誕節時，我哋有望重新出發。
國際航空運輸協會（IATA）理事長Willie Walsh就話，對下半年的旅行需求持審慎樂觀態度，又預計英國同美國之間嘅航班未來幾周內將會重新開放。
余絲韻