保險業監管局尋日譴責一名任姓嘅前個人保險代理，因違反《保險業條例》（第41章）及《持牌保險代理人操守守則》，同時禁止佢喺今年11月27日或之前向保監局申請牌照。原因竟然係關疫情事？
事緣呢位姓任叫煒書嘅代理喺上年年頭，亦即係新冠肺炎肆虐湖北嘅時候，喺社交媒體度發訊息「邀請」通訊錄上所有人士來港避疫，兼嚟幫襯佢買份保險。呢個「邀請」係體現到香港好客之道同拚搏精神，之不過個時間點就錯晒嘞。當時正值香港政府為阻斷疫情，向湖北省實施緊旅遊限制。事件當然響網上引起一輪聲討啦，而保監局亦都收到多宗投訴。
保監局就話任生咁做，違反咗佢之前任職保險公司有關跨境銷售嘅內部政策，同時有損或相當有可能損害公眾利益，並唔係持牌個人保險代理嘅適當人選。不過，局方話任生有悔意，不當行為持續時間較短，而且之前冇紀律處分紀錄。
保監局語重心長咁話，保險市場必須建基於信任，中介無論係親身抑或喺社交媒體平台，都要堅持道德操守，先可以積累公眾對保險業界嘅信心，對於不道德操守「零容忍」，干犯有關行為嘅人士將遭受嚴厲紀律處分。
余絲韻