特朗普下周75歲，美國現任總統拜登都成78歲，可見美國老人政治都幾嚴重！再睇番中國內地最新嘅人口數據，65歲或以上嘅人口有成1.9億人，佔整體13.5%。絲絲都不禁感嘆60歲都只不過係中年，78歲仲要日日返工！
不過，人口老化都有樣好，就係「銀髮族」新商機！最關鍵一環就梗係醫藥，星期一美國聯邦食品及藥物管理局（FDA）批准生物化學公司Biogen（美股：BIIB）可以賣治療阿茲海默症嘅新藥，係過去20年首次批准治療呢個病症嘅新藥上市。
阿茲海默症係認知障礙當中最常見嘅類型，喺香港又稱為老人癡呆，顧名思義，係老人病。患者會出現記憶力減退、語言障礙、反應遲鈍、迷路等。
獲批准嘅藥物「Aduhelm」，係美國監管機構批准嘅第一種減緩阿茲海默症認知能力下降嘅藥物。Biogen就估計，Aduhelm每年治療費用要5.6萬美元（約43.6萬港元），預計為公司帶來數十億美元收入。Biogen股價周一立即爆升60%，收市都仲升38%。
絲絲見全球已有超過5,000萬名阿茲海默症患者，預計到2050年會增至1.52億人。屈指一算，5,000萬名患者，一年要43.6萬蚊買藥，條數相當和味。
唔識買美股？鍾情港股其實都有選擇嘅。原來綠葉製藥（02186）開發、用於治療阿茲海默症相關輕中度癡呆症嘅新藥，上個月已攞到喺歐盟多國上市嘅許可資格。呢隻股周二收市升4%，報5.4元。