絲絲作為「資深」傳媒人，就梗係有成日上網起吓人底，睇吓其他人對某人嘅評價係點。有個外國記者就專登走去唱衰自己，結果發現原來散播謠言嘅網站，同埋聲稱可以幫手「洗白」、清除抹黑言論嘅竟然係同一批人！「網絡打手」產業發展到咁，簡直奇觀！
記者朋友分別喺5個網站上面唱衰自己，結果一個月內就被複製出21篇貼文，分布喺15個網站。點解會自動「細胞分裂」？好簡單，答案就係呢啲貼文旁邊嘅廣告：提供「聲譽管理」（reputation management）嘅付費服務，可以幫手移除唱衰你嘅內容。如果照呢啲廣告報價，以呢位記者朋友嘅情況大概索價兩萬美元（約15.6萬港元）。
佢搵咗一個經營聲譽管理服務嘅網站，同時，又專門複製網上攻擊文章四圍貼。「黃金方案」叫價699.99美元（約5,460港元），可以「由搜尋結果移除有關自己唔想要嘅訊息」。呢個網站負責人就勸世咁話，「要教啲細路唔好同陌生人講嘢，亦要教佢哋唔好信網絡言論」，認真苦口婆心。
如果你以為畀錢了事就可以冇手尾？咁就太天真喇！有人搵「聲譽管理」網站幫手刪除兩個留言，盛惠4,000美元都算，幾個月後，嗰兩個留言又重新浮現！個客就懷疑係「聲譽管理」網站搞鬼，令兩個留言浮番出水面，打算再賺佢一筆。
雖然記者朋友調查就做完，但係就刪除唔到自己唱衰自己嘅貼文，後來惟有直接搵網絡搜尋引擎處理，不過，都係確保唔到100%清除到呢啲負面留言。
網上世界真係非常複雜，真人可以呃你，網上評價一樣可以呃你。不過，絲絲有個疑問，就係呢位記者朋友點解要用真名去試咁傻呢？
余絲韻