講開銀行舵手，即俗稱「CEO」，通常會諗起佢有間私人辦公室，坐住喺大班椅上面嘆咖啡，但呢個畫面好快就要改變，除咗滙豐控股（00005）高層轉為混合工作模式外，就連渣打集團（02888）嘅行政總裁溫拓思（Bill Winters）都會無咗自己嘅獨立辦公室。
吓？唔通係聞到一陣陣嘅「魷魚香」？當然唔係！只係新冠肺炎疫情下，工作唔再局限喺辦公室，所以渣打都決定向混合模式轉型，全球幾百個渣打高層都同溫拓思一樣，齊齊放棄自己嘅專屬辦公室，據聞今年之內全部會改裝成會議室。溫拓思就解釋，依家辦公係講求靈活性同跨部門協作，而且專屬辦公室好嘥位，好快就會成為歷史！
其實，滙控行政總裁祈耀年一樣將自己「踢出」辦公室，睇嚟大行都搵緊一個新嘅工作模式。不過，相信呢位滙豐銀行經理Jonny Frostick都好有意見喇，有指佢之前心臟病發，同鬼門關「擦身」而過，同時「擦出」好大嘅覺悟，就係在家工作（WFH）好易做到猝死！
尤其喺疫情期間，在家工作令辦公室同家庭生活嘅界線變得模糊，好多時想為下星期做多少少準備，唔經唔覺就連星期六都喺屋企加班。到佢病咗嘅時候，先發現自己之前每日工作12個鐘，仲同同事無休止咁網上通話。所以佢承諾自己，之後要改變呢個工作模式，搵多啲時間陪屋企人，佢將呢件事喺網上發文，隨即收到20多萬個讚好，睇嚟網民都幾有共鳴。
余絲韻