絲絲講場:「企鵝仔」兩神秘高層年薪11億勝馬化騰

「股王」騰訊控股(00700)舊年食正「宅經濟」興起,業績表現亮麗,股價乘勢大漲,公司兩位高層年薪更加突破11億港元大關。

劉熾平舊年人工加20%

根據「企鵝仔」2020年報顯示,舊年有兩個人薪酬超過11億元,其中一位介乎11.215億至11.22億港元,而另一個更高達11.555億至11.56億港元,成為公司最高薪人士!要知道2019年,騰訊無人份人工超過10億港紙。至於係邊個?年報就無公布,但就知道兩位都唔係董事,市場人士就揣測其中一位係人稱「微信之父」嘅張小龍。

講吓其他高層先,2005年減住人工咁離開高盛,過檔到騰訊嘅執行董事兼總裁劉熾平,舊年人工按年增加20.56%,至超過4.27億元(人民幣‧下同),換言之每分鐘賺緊963蚊港紙。事實上,呢位1990年會考攞9條A嘅香港「打工皇帝」,舊年份糧以至增幅都係來自股份酬金。

至於主席馬化騰一直都唔係年報入面最高薪人士,但以佢手上接近8.05億股計算,單係收息(每股1.6港元)都袋超過12.87億港紙,完勝所有伙記。

不過,若果睇「工資、薪金及花紅」一欄,即係唔計股份酬金嘅人工,就別有洞天。

話說舊年全年全公司酬金增加咗34.68%至481.92億元,以集團上下有超過8.58萬名僱員計算,人均接近56.13萬元,不過由於兵力同期多咗36.53%,所以人均數字實際上比起2019年少咗7,800元左右,反觀馬化騰同劉熾平兩位「薪金同花紅」就錄得雙位數增幅,似乎有少許肥上瘦下嘅嫌疑喎。

余絲韻