被美國針對嘅內地科技巨頭華為要撈埋「養魚」？係咪真係咁霉呀？原來講緊嘅係「高科技養魚場」，果然係科技先驅，養魚都有科技含量，唔知華為出產嘅魚食落會唔會好味啲呢？
自從美國前總統特朗普對中國科企施加種種限制後，華為就諗盡辦法另謀出路。養魚場就係其中之一，呢個場位於中國東部，面積係兩個紐約中央公園咁大。上面加建咗數以萬計嘅太陽能電池板，配備華為自家製逆變器。一方面保護魚類唔會受到過多日光照射，另一方面仲可以發電添！
另一邊廂，華為連「採礦」都唔放過，喺煤產豐富嘅山西省，地底深處有無線傳感器和攝像頭監視住礦井氧氣含量，同留意住潛在機器故障，呢啲器材全部都係由華為提供。華為創辦人任正非上個月出席智能礦山創新實驗室揭牌儀式嗰陣就話：「現在我們只想自己多努力，努力尋找能生存下來的機會。」睇起上嚟，華為嘅求生欲又真係好強！
其實，華為咁多年嚟一直都探索緊電訊設備同智能手機以外嘅商機，尤其上一年最後一季手機出貨量暴跌42%後，危機感殺到埋身，就更加要「不務正業」，以新業務去抵銷番手機業務嘅損失。
美國由特朗普時代開始制裁華為，切斷佢先進半導體嘅供應鏈，拜登政府更加對一些供應商施加更嚴格限制。絲絲仲聽聞，拜登政府已通知部分華為供應商，收緊以前批准的出口許可證條件，禁止向華為出口5G相關設備。睇嚟，華為唔止要養魚，遲吓仲有機會要務農添！
余絲韻