絲絲講場:女高管佔比 亞太唔夠數!

據致同會計師事務對29個國家嘅調查顯示,女性佔高管比例有個關鍵水平,就係要超過30%。不過,亞太區就相對落後,只得28%。

調查顯示,全球女性擔任高管比例由上年29%增加到今年31%。最值得鼓舞係,女性CEO同董事總經理比例都有改善,2021年進一步上升到26%。調查仲講到,有69%受訪者認同,疫情改變工作模式,長遠有利女性發展事業。

小米快手董事全男班

不過,外媒就發現,近排大熱嘅中國巨企董事會竟然全男班!根 據指數公司MSCI明晟嘅報告,旗下所有國家世界指數(ACWI Index)入面25家冇女性董事嘅大型公司中,有14家就係中國公司,包括埋小米集團(01810)同快手(01024),點解咁dry啊?

至於日本女性職場地位,高盛嘅前副主席松井女士就話,佢雖然受惠於前總理安倍推動嘅「女性經濟學」,但要升到高層就好似有無形嘅閘阻住前進。疫情令日本有72%女性走入職場,比例高過歐美。但日企女性高管只得8%,同政府30%嘅目標仲差大截。絲絲希望各個企業都可以一視同仁,畀返職場女性同等嘅機會!

余絲韻