絲絲講場：花旗谷女強人 高管佔45.5%
喺呢個時代，職場上嘅男女不平等似乎有所改善，趁住三八婦女節就快到，花旗集團公布舊年香港區員工嘅分布情況，喺助理副總裁至董事總經理嘅職級入面，女性員工比例由3年前嘅44%，增加去到45.5%，反映銀行都幾在意提升員工女性比例，尤其喺高級管理層明顯增加。
花旗香港嘅女員工能獲晉升和聘任為中層同高層管理人員嘅比例，舊年分別升至49.5%及48.7%，喺2019年分別為40%及42%。該行同時提升初級職員嘅多樣性，舊年加入花旗嘅管理見習生入面，有53%係女性，2017年只有42%。
支援準媽媽 挽留人才
至於零售銀行業務，有46%管理見習生並非主修商科，比例遠遠高過2017年嘅12.5%。花旗集團香港及澳門區行政總裁伍燕儀（Angel）話，嚟緊會繼續透過招聘、培訓同埋留任嘅方式，再配合一啲數據，進一步提升團隊多元化。
喺人才留任方面，花旗都幾鼓勵內部晉升，畀員工可以好好發揮，繼續拓展個人事業，尤其關注職業女性生完小朋友之後，往往面對應唔應該離職去湊小朋友嘅艱難抉擇，花旗因而推出留任新進媽媽嘅計劃，特別為即將為人母親嘅同事提供資源同支援，幫準媽媽籌備喺產假前、同埋喺生育後重返崗位嘅過渡安排。Angel仲話，近排仲研究緊點樣招攬想重返職場嘅女性添。
余絲韻