絲絲講場：渣打開工利是加碼睇彩數
為慰勞一班「打工仔」過去一年嘅付出，渣打銀行（香港）嘅員工開工利是實行「疫」市加碼，員工除咗同舊年一樣收到100蚊開工利是外，每人仲可贏取額外50至2,000蚊添。
渣打年年12月都會舉辦「員工感謝日」，農曆新年期間管理層亦會「洗樓」派利是，而今年受制於社交距離限制，呢啲活動無奈地不能「面對面」進行。不過，好彩如今科技發達，呢啲問題都不再係問題啦！
農曆初七係「人日」，渣打一於用虛擬幸運輪為開工利是「加碼」，連疫情期間無法見面嘅同事，都可以齊齊感受到牛年喜慶氣氛，大家一齊開開心心過肥年。
至於中銀香港今年嘅開工利是都幾大封吓喎，人人有一張「啡牛」（500蚊）迎牛年，農曆初五第一日開工就收到喇，會透過BoC Pay派發。
余絲韻