絲絲講場:滙豐前主席重遊舊地想當年

趁住滙豐銀行慈善基金成立40周年,好耐冇露面嘅滙豐前主席艾爾敦(David Eldon)亦有出席儀式,仲同大家想當年。講返當年與「滙豐學人」,即係有份拎到滙豐獎學金嘅大學生一齊茶敍嘅趣事,話舊時啲大學生見到佢好鬼緊張,自己惟有主動出擊撩人傾偈,等大家放鬆啲喎!

與大學生見面主動破冰

艾爾敦喺1999至2005年期間做滙豐主席,同時兼任滙豐銀行慈善基金主席,當時拎到獎學金嘅大學生就有見識大場面嘅機會,可以去到滙豐總行大廈同一班高層見面、傾吓偈。艾爾敦話,啲學生哥個個都悉心打扮,仲着晒「老西」,但見到佢呢個主席就有啲驚青喇,佢就主動破冰,同大家齊齊互動。

唔計母語英文,艾爾敦連阿拉伯語同西班牙文都好得,算有語言天分,唔知幾年前廣東話係「有限公司」嘅佢,呢幾年有冇大躍進呢?

慈善基金40周年之際,滙豐將捐出1.4億元支持10個項目,範疇包括未來技能發展、提升市民生活質素,同埋可持續發展、應對氣候變化方案等,可以惠及全港超過72萬名市民,即係等於每10個人,就有一個受惠。

余絲韻