絲絲講場：滙豐夥中電靠太陽能搵外快
天台安裝太陽能發電板唔係新鮮事，但知唔知咁仲可以賺到額外收入？話說位於將軍澳嘅滙豐大廈有一個2,300平方米咁大嘅天台，鋪滿由750塊太陽能板組成嘅太陽能發電系統，據聞呢個系統每年可以發電約22.1萬千瓦時（kWh），發電量夠54個香港家庭用一年！
每年減逾10萬公斤碳排放
呢個太陽能發電系統每年可以減少10.8萬公斤碳排放量，相當於5,000棵樹一年減除嘅二氧化碳量！事實上，發展可再生能源已經成為大趨勢，唔知會唔會有更多企業加入呢？
原來滙豐呢個項目係由中電源動設計同建造，佢哋由舊年至今係香港已經完成總發電量達4兆瓦（MW）嘅太陽能發電系統，今次滙豐嘅太陽能系統仲連埋中華電力嘅電網，根據中華電力嘅「可再生能源上網電價」計劃，可以幫滙豐帶來上網電價收入。
滙豐香港區營運總監林慧虹就話，企業都可以喺氣候變化議題上擔當重要角色，今次呢個項目幫佢哋慳唔少能源成本，仲想套用於滙豐香港嘅其他設施。其實今年10月，滙豐已公布至2030年達到「零」碳排放嘅目標，仲希望2030年於全球使用嘅電力全部可以由可再生能源發動，一於睇吓佢哋之後嘅表現。