絲絲講場：虛銀旺場 螞蟻員工懶理「酸葡萄」
虛擬銀行最近成為城中熱話，尤其係依家呢個超低息環境，虛銀動輒1厘嘅活期息，又的確好鬼吸引，成為大家茶餘飯後嘅吹水話題。講開虛銀，有啲業界人士喺幾個禮拜之前，吹到好行話螞蟻銀行會開唔到業，卒之咪如常面世，聞說開業頭四日都有成五千幾個市民成功開戶，成績都算唔錯呀！
雖則上個禮拜得三個工作日，但已經有螞蟻銀行同平安壹賬通兩間虛銀宣布正式開業，另外富融亦都宣布試業，似乎大家都好想喺第三季完結之前嚟啲搞作，加埋之前已經宣布開業嘅五間，即係話目前香港八間虛銀，已經有七間正式應市啦。
絲絲八到，有啲口痕友喺幾個禮拜前，話市傳螞蟻銀行會開唔到業喎，依家人哋唔單止開到，聽講反應都算唔錯，銀行個App仲上埋Apple App Store個熱搜榜添。不過最新再傳出人哋五、六千嘅下載數量有「摻水」成分，所謂樹大招風，無乜辦法！
每日逾千人成功開戶
絲絲同一個螞蟻職員兼朋友仔吹開水，佢聽到之後就哭笑不得，自貶螞蟻邊有咁神通廣大，可以操控到Apple嘅App Store吖！
有消息靈通嘅老友就話喇，螞蟻開業頭四日，成功開戶嘅市民都有成五千幾個，即係平均每日有成千幾人開到。嘩！螞蟻集團即將闖關來香港上市，市面好快就會迎來一股螞蟻熱潮呢。
余絲韻