Market Insight：資金輪流轉吼買5G股

上周五恒指公布季檢，阿里巴巴（09988）、小米集團（01810）及藥明生物（02269）獲納入恒指，美團點評（03690）則無緣「染藍」，今日各股會有咩表現，不妨拭目以待。

喺現今中國、美國及香港三地互為影響的格局中，香港的國際金融中心、經貿及航運中心的地位大受打擊，估計港股後市難有作為，但短線仍然有資金帶動，各位缸邊友只能見步行步，到咗散水之時，就千萬唔好留戀，慎防走唔甩。雖然恒指再上空間有限，但話說回頭，在資金輪動下，不同板塊都有機會炒上，炒股唔炒市仲有啲睇頭。

上周最令人驚喜是資金炒起三大中資電訊股，中國聯通（00762）上周四更單日飆升逾25%，其餘中國電信（00728）及中國移動（00941）都有唔錯升幅。但現階段高追，老古就唔多建議喇！

不如試一試股價長期落後的5G概念股，其實呢個板塊一直都受市場關注，亦有國策支持，但自三月份大調整之後至今仍未有資金炒作，極有機會成為下一次資金輪動的受益者。

京信通信上望3.9元

先睇股價行得快啲嘅京信通信（02342），該股過去半年大致喺2.8至3.8元之間上落，近日形態似要向上突破三角形，未來若配合成交量升穿3.5元兼企穩，可以小注追入，上方阻力位在3.9元。至於相對穩陣的中國通信服務（00552），三月廿三日低見4.65元，以上周五收市價5.14元計，相距僅一成。而該股四月至今形態似圓底向上，長線睇好可於現價買入，上方阻力6元。

至於中國鐵塔（00788）近日成交量增加，似乎有資金埋位。雖然過去五個月股價拾級而下，且受制三月初以來的降軌，但該股七月底至八月初於1.4元水平築底，短線若配合成交升穿1.5元，可考慮小注追入，上方阻力1.7元，向下跌穿1.4元止蝕。

最後，近日中美關係轉趨緊張，而美股三大指數已反彈至高位，納指更已創新高，大鱷索羅斯亦出聲提示有危機，反映環球股市並非風平浪靜。再睇港股向上的動力亦不大，未來或受中美衝突而陷入泥沼，各位缸邊友小心睇路！