Market Insight：金價料反覆吼位分注買

老古覺得，愈係接近美國總統大選，愈要慎防大市冧檔。雖然有分析指美國對中國強硬向來是選舉議題，大選過後，中美關係又會回到鬥而不破的局面；加上特朗普大選前要保住股市及經濟復甦，更是投鼠忌器！但係老古反而認為，破罐破摔更符合特朗普目前狀態，在疫情愈演愈烈之際，經濟根本冇時間復甦；而近月美股反彈已近歷史高位，全無基本因素支持，再向上的空間有限，或有調整壓力。目前的問題是，何時推出「核選項」能對其選舉工程利益最大化？因此，老古維持唔好睇得太好，順勢炒波幅的態度，仲要記得控制注碼。

金礦股適合短炒

講起風險較細的投資，則非近期風靡全球金融市場的黃金莫屬了，個別大行上望3,000美元，即係仲有50%升幅。老古雖然都睇好黃金，上次推介已是三月份的事，但金價向來逐級上，就算真係可以升到3,000美元，都唔會一蹴而就，中間總會反覆，加上美匯指數近日跌勢急速，隨時見支持展開反彈，屆時金價或出現調整。因此，中線買金，不如等回調後再買，目前唔好高追。

至於點樣買法？可以考慮實金、金礦股、黃金ETF等，當中各有利弊。實金買賣差價相對大，又有儲存問題，想短線就唔好喇，而中長線則可以考慮回調後分注買入，切忌一注獨贏，且現價咁高已非時機。

金礦股對金價相對敏感，感覺似玩窩輪，又要考慮企業管治因素，但升幅較大，適合短炒。當中以山東黃金（01787）的表現最佳，單計七月份，該股開市價16.44元，七月二十八日最高見27.3元，升幅最多66%；上周五收報24.25元，升幅亦有47%，遠遠拋離紫金礦業（02899）及招金礦業（01818）的表現。受得刺激，梗係買山東黃金。

ETF方面，買SPDR金ETF（02840）屬穩陣之選，屬於有實金支持的ETF，貼近金價走勢，且買賣差價小及買賣方便的優勢。投資者若能承擔較高風險，則可以考慮兩倍槓桿FL二南方黃金（07299）。

古勝