絲絲講場：花旗推虛擬工作體驗校園揀蟀

金融界求才若渴，銀行業更不時出現人才爭奪戰，花旗集團嘅招聘策略擴展到校園，推出咗虛擬工作體驗計劃，畀全球有興趣投身銀行界嘅大學生報名參加，學生哥諗到一啲好嘅方案，仲有機會獲得花旗直接聘用，又或者可以試吓做暑期實習生添。

花旗亞洲推出咗多個虛擬工作體驗計劃，畀五湖四海嘅大學生報名，計劃推出短短兩個禮拜，花旗話有成4,000名大學生報名，當中有220個香港大學生添。望落啲計劃都涵蓋唔少花旗主要業務，例如投資銀行、金融市場及證券同埋零售銀行業務等等。

聽聞個虛擬工作體驗計劃都有唔少好構思，包括每個單元會包含一個由花旗銀行家設計嘅個案研究，提出特定嘅業務問題，再由學生去提出解決方案。

方案夠正嘅話，學生甚至有機會獲花旗即時聘用，今時今日拍片、拍Vlog，透過畫面講故事已成為大趨勢，花旗仲鼓勵學生同時附上自拍短片，用比較生動嘅方式介紹自己嘅個人履歷。

余絲韻