絲絲講場：樂視退市前夕 跌剩薯片價

千億市值變到得7億

絲絲講緊嘅係樂視退（前稱樂視網），回想創辦人賈躍亭曾經風光一時，隻股亦都曾經被投資者捧到上天，小股民定必心傷。話說一五年五月，樂視網升到歷史高位179.03元（除權價）（人民幣‧下同），內媒分析話如果以當日貴州茅台最高股價233.81元計算，樂視退股價係茅台嘅76%，相當於「大半樽茅台」，但周一係樂視退喺A股市場最後一個交易日，收市價係0.18元，即係一塊薯片嘅價錢，市值只係7.18億元。

股民買一手留念遭拒

內媒都分享咗段小插曲，話說當日有股民話要以0.17元買入一手（100股）樂視退留作紀念。不過，交易平台指「警示未確認或委託方式不支持，委託失敗！」其實，樂視退早就因為業績唔符合交易所規定，從六月五日起，正式進入退市整理期，為期三十個交易日，結果如市場所料，無得留低！

賈躍亭早前分享心聲，話雖然過去幾年，自己並無實際控制及管理樂視退，只能睇住公司現狀而心急如焚，但從來都無忘記股民咁話。作為創始人嘅佢，喺得到個人債權人委員會批准後，會喺債權人信託中預留不超過10%比例，主要係補償樂視退股民嘅損失！

之但係，賈生本身都債台高築，究竟仲有幾多錢賠償畀小股東呢？絲絲都諗唔通！所以絲絲向來都相信買股千祈唔好孤注一擲，一旦揀錯都唔使輸身家、瞓唔着！

余絲韻