Market Insight：地產股無運行 撈唔過

恒指支持位24600

事實上，港股由三月低位21,139點，反彈至本月高位26,782點，期內升5,643點，若調整整個升幅的黃金比率0.382，即支持位為24,600點，與現時的50天線相若。若回調0.5，支持位為23,900點，缸邊友暫時睇住呢兩個支持位。

至於會唔會演變成類似今年三月份的大冧市？就要睇環球疫情發展，還有中美雙方就南海、香港及台海問題衝突升級與否？如果你問老古點睇，老古梗係話大家「飲杯茶、食個包」、和和氣氣，但是現實不以人的主觀意志為改變，尤其是現今社會複雜多變，並非以往日出而作、日入而息的農業社會，妄想以個人意志凌駕一切，邊有可能？

因此未來點樣發展，就連落場廝殺的旗手都決定唔到，大家只可以見步行步，控制注碼。進取者可以喺重要支持位分注吸納；想穩陣啲，可以等港股重上10天線再搭順風車。若然唔想提心吊膽，自然可以作壁上觀。

經濟不景打擊舖租

以往香港食開四方飯，但依家處境尷尬，夾喺中間、兩邊不是人，外資嘴裏說香港地位暫時無可取替，身體卻很誠實，撤資消息不絕於耳，對香港經濟打擊甚大。最直接就是甲級商廈、店舖、商場的租金大冧，經濟不景又會減低置業需求，影響本地大地產商所持物業的估值。相信磚頭有價的朋友，對地產股呢個板塊都係睇定啲，勿急於博反彈。

七月初港股大升，地產板塊不升反跌，目前大市下跌，自然唔會有運行。新鴻基地產（00016）上周五收報96.65元，短線跌穿埋95元支持位，可能要試早前低位87元。恒基地產（00012）亦唔多好，依家喺29元水平，貼近28.5元的支持位，若跌穿或試低位26元。長實集團（01113）向下較大支持位為40元，有貨者跌穿該水平一定要止蝕。

至於屬於半隻地產股的港鐵公司（00066），現價39元水平，好明顯係小雙頂，股價仲跌穿埋頸線，屬於四隻股票中最弱，再創近年新低幾近無懸念，因此，呢個板塊都係唔好輕舉妄動。

古勝