疫情又再升溫，絲絲都多咗居家避疫。當喺屋企無所事事，自然會搵吓零食止吓口痕。原來絲絲唔係小部分例子，有些企業更因為「宅經濟」嘅興起而業績好咗。
就好似百事公司第二季業績好過市場預期，收入只係按年跌咗3%至159.5億美元，靠嘅就係Cheetos粟米棒同埋Doritos玉米片等零食銷量增加，令百事子公司Frito-Lay嘅零食銷售喺上季增長咗7%。健康零食嘅桂格燕麥，銷售更大增23%。
其實，一場疫症徹底改變咗人們嘅生活方式，商家做生意嘅方法亦要跟隨轉變。例如Oreo、Ritz嘅製造商億滋國際，就計劃淘汰四分之一嘅產品，原因係包裝食品需求急增嘅同時，很難維持廣泛嘅產品線，而為咗減少庫存同包裝成本就要鎖定某啲產品。朱古力或花生醬夾心餅等食物，食咗會令人有安慰感覺，銷量就大增，但好似香口膠等就銷量下跌。無法啦，戴住口罩邊會諗起食香口膠！
余絲韻