絲絲講場：林一鳴搞創科一腳踢
著名投資者林一鳴（Eddie）一向諗頭多多，近期又有新搞作！早前佢喺fb自爆：「幾十歲人才搞創科，從砌Website、買Domain Name、租Hosting、拍攝視頻以至剪片配音......，一手一腳砌網上教育平台『博士在線』，過程搞笑又好玩。絕對係真人真事，這個傻人就是我！」
打造網上教育平台
Eddie講炒股就講得多，絲絲估唔到佢對科技都有心得。原來佢十幾歲時攞過香港青年科學家獎，仲曾經喺泰王面前展示過個人傑作，當時對於科技確有幾分熱情！但直至九十年代，佢發現喺香港，做金融比較做科技容易搵食，於是投身金融界！
今年三月時，香港疫情愈嚟愈嚴重，佢深信網上學習會成為潮流，於是就開始不斷研究。突然間，十多歲時對科技嘅那團火，又再猛烈地燃燒起來！佢講笑話，自己本身都有做創投，專門投資一啲科技公司，但創辦人多數廿多歲，三十多歲嘅已經唔多，更何況自己五十一歲才來搞科創！
唔講唔知，原來佢除咗曾經迷醉科技外，廿幾歲時仲學過攝影，試過兼職影結婚相。所以今次搞創科，可將昔日知識重新實踐，確實有意義！
佢仲分享，依家平台已經有20個課程，導師可以有最高80%分成，平台內容包括考保險牌、地產代理牌、樂理考試以至紅酒品評等，自己唔會係主要講師，佢要建立一個教育界嘅淘寶，等各人將自己嘅專長喺平台上分享，所以不設內容限制，投資以至烹飪技巧視頻，均無任歡迎！佢嘅短期目標係希望有100個課程，長線目標係努力搵投資者入股！
余絲韻